Qəbələdə güllə atıcılığı yarışı keçirilib
Qəbələ, 15 dekabr, Mustafa Dadaşov, AZƏRTAC
“Konstitusiya və Suverenlik İli” çərçivəsində Qəbələdə dövlət qurumlarının əməkdaşları arasında güllə atıcılığı yarışı keçirilib. Qəbələ Atıcılıq Klubunda təşkil edilən yarışda 17 dövlət qurumunu təmsil edən 30-u kişi və 19-u qadın olmaqla, ümumilikdə, 49 iştirakçı mübarizə aparıb.
Bu barədə AZƏRTAC-ın bölgə müxbirinə Şəki-Zaqatala Regional Gənclər və İdman İdarəsindən məlumat verilib.
Bildirilib ki, yarışın yekun nəticələrinə əsasən, qadınlar arasında Fövqəladə Hallar Nazirliyinin əməkdaşı Aynur Ağayeva Məmmədova birinci yerə layiq görülüb. Azərbaycan Hava Yollarını təmsil edən İlhamə Cəfərova ikinci, İcbari Tibbi Sığorta üzrə Dövlət Agentliyinin əməkdaşı Aynur Əsgərova isə üçüncü olublar.
Kişilər arasında Azərbaycan Hava Yollarının nümayəndəsi Ayaz Kərimov qalib adını qazanıb. Eyni qurumdan olan Ramin Əmirov ikinci yeri tutub. Üçüncü yerə isə Fövqəladə Hallar Nazirliyinin əməkdaşı Fuad Əliyev layiq görülüb.
Bölmənin digər xəbərləri
