QHT sədri: Ötən 20 ildə Azərbaycanda sosial sahədə inkişafın və tərəqqinin şahidi oluruq
Bakı, 15 oktyabr, AZƏRTAC
Dünya səviyyəsində tanınan və qəbul edilən siyasi xadim, Ulu Öndər Heydər Əliyev 2003-cü il oktyabrın 1-də Azərbaycan xalqına tarixi müraciətində xalqımızın işıqlı gələcəyini inandığı və güvəndiyi bir şəxsə etibar etmişdi. Həmin dövrü xatırlasaq görərik ki, dağılmağa və parçalanmağa sürüklənmiş Azərbaycan dövlətini Ümummilli Lider yenidən qurmuşdur.
Ulu Öndər Heydər Əliyev xalqa müraciətində də qarşıda hələ çox işlərin görülməsi vacibliyini qeyd etmişdi. “İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək”, - deyən Heydər Əliyevin nəzərdə tutduğu taleyüklü məsələləri həqiqətən də Prezident İlham Əliyev həll etdi.
2003-cü il oktyabrın 15-də keçirilmiş seçkilərdə seçicilərin 76 faizdən çoxunun səsini qazanmış İlham Əliyev əməli işləri və xidmətləri ilə xalqın inamını və sevgisini günbəgün təsdiqlədi. O, Azərbaycanın işğal olunan ərazilərini azad etdi, dövlətimizin suverenliyi və ərazi bütövlüyünü təmin etdi. Prezident İlham Əliyev təkcə bu xidməti ilə nəinki müasir dövrün, ümumilikdə Azərbaycan tarixinin böyük şəxsiyyətinə çevrildi və öz adını ölkəmizin tarixinə Müzəffər Sərkərdə olaraq yazdı.
Bu sözləri AZƏRTAC-açıqlamasında “İnformasiya və Sosial Təşəbbüslərə Dəstək” İctimai Birliyinin sədri Cəsarət Hüseynzadə deyib.
Onun sözlərinə görə, dövlətimizin başçısı İlham Əliyevin ötən 20 illik prezidentlik dövrü Azərbaycanda bütün sahələrin inkişafı ilə yadda qalıb. Ölkənin müharibə şəraitində olması, ordunun gücləndirilməsi və müasir hərbi texnika ilə təminatın vacibliyi fonunda Prezident İlham Əliyev tərəfindən paralel olaraq bütün vacib sahələr diqqətdə saxlanılıb.
Diqqətdə saxlanılan bu sahələrdən biri və ən əsası da məhz sosial sahə olub. Prezident İlham Əliyev tərəfindən həyata keçirilən siyasi kursda sosial dövlət fəlsəfəsi və sosial rifah paralel olaraq əsas götürülüb.
Prezident İlham Əliyev dəfələrlə çıxışında bildirib ki, Azərbaycan sosial dövlətdir.
Dövlətimizin başçısının sosial dövlət fəlsəfəsinin əsasında hər bir vətəndaşın layiqli həyat şəraitinin təmin edilməsi prinsipi durur. Bu məqam bir çox sosial proqram, habelə layihələrdə real əksini tapıb.
QHT sədri qeyd edib ki, iqtisadiyyatın inkişafı və insanların sosial rifah halının yüksəldilməsi məqsədilə Azərbaycan Prezidentinin təşəbbüskarı olduğu qanun layihələri, həmçinin imzaladığı fərman və sərəncamlar əsasında həyata keçirilən sosial layihələr vətəndaşlarımızın yaşayış səviyyəsinə öz müsbət təsirini göstərib. Prezident İlham Əliyevin xüsusi diqqəti hər zaman məhz şəhid ailələri və müharibə ilə əlaqədar əlilliyi olan şəxslərdə olub. Bu diqqətin əyani təzahürüdür ki, şəhid ailələri və müharibə ilə əlaqədar əlilliyi olan şəxslər dövlət hesabına mənzillərlə təmin edilir, onlara minik avtomobilləri verilir və bu sosial dəstək mexanizmi dünyada nadir təcrübə sayılır. Bu gün şəhid ailələri, müharibə ilə əlaqədar əlilliyi olan şəxslərin mənzil və fərdi evlə təminat proqramı uğurla davam edir. Həmin kateqoriyalardan olan vətəndaşlara bu il daha 750, postmüharibə dövründə 5250, ümumilikdə ötən dövrdə 14 min 50 mənzil və fərdi ev təqdim olunub.
“Prezident tərəfindən verilən tapşırıqlar əsasında həssas qrupun cəmiyyətin əsas və aparıcı qüvvəsi olması üçün müxtəlif dəstək mexanizmlərdən yararlanması əsas prioritetdir. Zəfərimizlə başa çatan Vətən müharibəsindən sonrakı dövrdə şəhid ailələri üzvləri və müharibə iştirakçıları olan 19,6 min şəxs aktiv məşğulluq proqramlarına cəlb olunub. Onlardan 10,1 min şəxs özünüməşğulluq proqramına cəlb edilməklə onlar üçün proqramın dəstəyi ilə kiçik təsərrüfatlar yaradılıb. Cari ilin ötən dövründə Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi tərəfindən 1115 nəfər əlilliyi olan şəxs özünüməşğulluq proqramına cəlb olunub. Özünüməşğulluq proqramı bu gün dövlətin sosial dəstək mexanizmlərindən vacib elementi olaraq çıxış edir. Bu proqram beynəlxalq təşkilatların da tövsiyə etdiyi əsas alətlərdən biri sayılır. Bunun nəticəsi olaraq, özünüməşğulluq proqramına cəlb olunanların illik sayı isə ötən dövrdə 14 dəfə artıb. Hazırda 73 min şəxs özünüməşğulluq proqramına cəlb edilərək onlara verilmiş aktivlər hesabına kiçik təsərrüfatlarını yaradıblar”, - deyə C.Heseynzadə əlavə edib.
Bildirilib ki, Prezident İlham Əliyev tərəfindən elan olunan sosial islahatlar siyasət nəticəsində mühüm dəyişikliklərə imza atıldı. Son 5 ildə 4 sosial islahat paketi elan edildi və bunun nəticəsində vətəndaşların rifahı naminə mühüm qərarlar qəbul edildi. Xüsusən, bu qərarlar həssas sosial təbəqənin mənafeyi baxımından yüksək qiymətləndirilir. Dövlət başçısının tapşırığı əsasında həyata keçirilən bu sosial islahatlar nəticəsində ölkəmizdə sosial ödənişlərdə ciddi artım dinamikasına nail olunub. Bu dövrdə minimum aylıq əməkhaqqı 2,7 dəfə, minimum aylıq pensiya 2,5 dəfə artıb. Sosial müavinət və təqaüdlər üzrə ayrılan illik vəsaitdə 5 dəfəyədək, ünvanlı sosial yardımın orta aylıq məbləğində 2,9 dəfə artım baş verib. 2018-2023-cü illərdə 4 milyondan çox vətəndaşı əhatə edən 4 sosial islahat paketi icra olunmaqla, bu islahatlar üzrə əlavə olaraq illik 6,8 milyard manat vəsait yönəldilib. İslahatlar nəticəsində şəhid ailələrinə və müharibə ilə əlaqədar əlilliyi olan şəxslərə verilən sosial ödənişlər əhəmiyyətli dərəcədə artıb. Bu artımlar həmin kateqoriyadan olan şəxslərin sosial təminatında mühüm rol oynayıb.
C.Hüseynzadə diqqətə çatdırıb ki, dövlətimizin başçısının apardığı uğurlu sosial siyasət həm də insanları aldığı xidmətlərin rahatlığında da xüsusi əhəmiyyətə malikdir. Ölkədə mövcud olan 159 sosial xidmətdən 140-dan çoxu (90 faizdən çoxu) artıq rəqəmsal platformada təqdim edilir. Sosial ödənişlərin əksəriyyəti elektron sistem üzərindən proaktiv təyinatla icra olunmaqdadır.
“Ötən 20 ilə diqqət etdikdə bütün sahələrdə olduğu kimi sosial sahədə dəyişikliklərin, inkişafın və tərəqqinin şahidi oluruq. Bütün bu dəyişikliklər Azərbaycan vətəndaşının sosial rifahının yaxşılaşdırılmasına, Azərbaycan dövlətinin inkişafına xidmət edir. Sevindirici məqamlardan əsası da odur ki, bu dəyişiklik və inkişaf davamlı və artan xətt üzrə inkişaf edir”, - deyə QHT sədri vurğulayıb.
Bölmənin digər xəbərləri
