Bakı, 10 sentyabr, Ceyhun Xəlilov, AZƏRTAC

Bu gün burada dünyanın müxtəlif böyük, inkişaf etmiş ölkələrindən gələn alimlər toplaşıblar. Bu, kifayət qədər mühüm işdir. Müzakirələrin və çıxışların səmərəli olacağına ümid edirəm və möhtəşəm nəticələr verəcəyini düşünürəm. Bu, Azərbaycan dövlətinin bizə göstərdiyi qayğıdır.

Bu fikirləri sentyabrın 10-da - Xaricdə Yaşayan Azərbaycanlı Alimlərin Forumunun 2-ci günündə Qırğızıstan Respublikasının Əməkdar həkimi, "Qırğızıstan-Azərbaycan Dostluq və Əməkdaşlıq Cəmiyyəti"nin sədri Akif Aleferdov AZƏRTAC-a müsahibəsində bildirib.

Onun sözlərinə görə, Azərbaycan xalqının ən böyük problemlərindən biri olan ərazi bütövlüyü məsələsinin həllindən sonra azərbaycanlı alimlərin, ziyalıların üzərinə böyük rol düşür. Təkcə elmi məsələlərin həllində deyil, həm də sosial, mədəni məsələlərdə onların rolu artırılmalıdır. Bu, ölkəsini sevən hər bir ziyalının vətəndaşlıq borcudur.

Qeyd edək ki, Forumda dünyanın 23 ölkəsindən 80-dən çox azərbaycanlı alim iştirak edir.