“Qızıl Kəlmə” Ədəbi Mükafatı təqdim edilmişdir
Bakı, 6 may (AZƏRTAC). Mayın 6-da M.F.Axundzadə adına Milli Kitabxanada Mədəniyyət və Turizm Nazirliyinin dəstəyi ilə təsis olunmuş “Qızıl Kəlmə” Ədəbi Mükafatının təqdim edilməsi mərasimi keçirilmişdir.
AZƏRTAC xəbər verir ki, mərasimdə mədəniyyət və turizm naziri Əbülfəs Qarayev çıxış edərək bildirmişdir ki, “Qızıl Kəlmə” Ədəbi Mükafatı nazirlik tərəfindən 2008-ci ildə təsis olunmuş, 2009-cu ildə ilk qaliblər müəyyənləşdirilmişdir. Azərbaycan dövlətinin mədəniyyət siyasətinin tərkib hissəsi olan bu müsabiqə çağdaş milli ədəbiyyatın ən parlaq örnəklərini dəyərləndirmək, yaradıcı insanların əməyini stimullaşdırmaq, müasir qələm sahiblərini geniş oxucu dairələri tərəfindən maraqla qarşılanan əsərlərin yaradılmasına təşviq etmək məqsədi ilə keçirilir. Müsabiqənin bütün proseduru mədəniyyət və turizm naziri tərəfindən imzalanmış əsasnamə əsasında və seçilmiş münsiflər heyətinin rəyi ilə tənzimlənir.
Mədəniyyət və Turizm Nazirliyinin şöbə müdiri Vaqif Bəhmənli bildirmişdir ki, “Qızıl Kəlmə” Ədəbi Mükafatına namizədləri bu qurumun nümayəndələrindən və nüfuzlu qələm sahiblərindən ibarət 11 nəfərlik münsiflər heyəti seçmişdir. Ədəbi mükafat nəsr, poeziya, bədii tərcümə və ədəbi tənqid - publisistika olmaqla 4 nominasiyanı əhatə edir.
Milli Məclisin deputatı, Xalq Şairi Sabir Rüstəmxanlı vurğulamışdır ki, əsasnaməyə uyğun olaraq 2011-ci il üzrə “Qızıl Kəlmə” Ədəbi Mükafatı elan edilmiş, martın 1-də təqdimat başa çatmış, müsabiqəyə 25 əsər daxil olmuşdur.
Bütün əsərlər münsiflər heyətinin hər bir üzvü tərəfindən oxunmuş və mayın 3-də müsabiqə komissiyasının yekun iclası keçirilmişdir. Əsasnaməyə uyğun səsvermənin nəticələri ümumiləşdirildikdən sonra yetərli keçid balları toplayan əsərlər müəyyən edilmişdir. Komissiya üzvləri ədəbi-tənqid və publisistika əsərləri üzrə nominasiya ilə əlaqədar xüsusi təkliflə çıxış etmişlər.
Bu məqsədlə son iki ildə həmin janrlar üzrə nəşr olunmuş ən maraqlı kitablar nəzərdən keçirilmişdir. Münsiflər heyətinin yekun protokolu üzrə ədəbi-tənqid və publisistika əsərləri üzrə Xalq Yazıçısı Anarın “Unudulmaz görüşlər”, nəsr əsərləri nominasiyası üzrə yazıçı-dramaturq Natiq Rəsulzadənin “Çitayuşiy mısli” (rus dilində), Varisin “Bir ovuc torpaq” romanları, poeziya əsərləri nominasiyası üzrə Əjdər Olun “Yaşa” şeirlər kitabı, Ağacəfər Həsənlinin “Ümidimin adına küçə” şeirlər kitabı, bədii tərcümə əsərləri nominasiyası üzrə Telman Vəlixanlının F.Dostoyevskinin “Karamazov qardaşları” romanı və Kamran Nəzirlinin “Heç kim heç vaxt ölmür” orijinal tərcümələrdən ibarət kitabı “Qızıl Kəlmə” Ədəbi Mükafatına layiq görülmüşlər.
“Qızıl Kəlmə” Ədəbi Mükafatı çərçivəsində “Şans” ödülünə iki müəllifin əsəri - Nəriman Əbdülrəhmanlının, Andrey Platonovun “Seçilmiş əsərləri” tərcümələr kitabı və Əbülfət Mədətoğlunın “Ürəyimdəki sənsən” şeirlər kitabı layiq görülmüşdür.
Mükafatlar laureatlara təqdim olunmuşdur.
Xalq Yazıçısı Anar, yazıçı Natiq Rəsulzadə, şair Əjdər Ol və başqaları bu fəxri mükafata layiq görüldüklərinə görə minnətdarlıqlarını bildirmişlər.
Bölmənin digər xəbərləri
