Bakı, 27 aprel, G.Məlikova, AZƏRTAC

Aprelin 27-də BMT-nin Sivilizasiyalar Alyansının VII Qlobal Forumu çərçivəsində “Qlobal təhsil vasitəsilə inklüzivliyin və inteqrasiyanın təşviqi” mövzusunda bölmə iclası keçirilib.

AZƏRTAC xəbər verir ki, iclasın moderatoru RİAK-ın təhsil üzrə işçisi Ekaterina Çimiris Forumun əhəmiyyətini və burada müzakirə olunan məsələlərin vacibliyini qeyd edib. O bildirib ki, iclasın əsas məqsədi xarici tələbə inteqrasiyası, inklüziv və qlobal təhsil planı məsələlərini müzakirə etmək və onların həllinə yol tapmaqdır.

Qətər Dövlətinin Xarici İşlər Nazirliyinin Beynəlxalq Texniki Əməkdaşlıq Departamentinin direktoru Tariq Al-Ansari 60 milyon uşağın təhsildən təcrid olunduğunu, bundan əlavə dünyanın bir çox ölkələrində ümumiyyətlə təhsilin keyfiyyətinin aşağı səviyyədə olduğunu bildirib. Qeyd edib ki, təhsil yalnız gənclərə elm aşılamır. Yeni nəsli sülh nəslinə çevirmək üçün ilk növbədə təhsilin səviyyəsini qaldırmaq və bu ideyanın dünyanın bütün ölkələrində beynəlxalq səviyyədə təbliğinə nail olmağa çalışmaq lazımdır.

Amerika Universitetinin professoru Muhammed Abu-Nimer işlədiyi qurum barədə məlumat verib, təmsil etdiyi müəssisənin bir çox beynəlxalq və mədəniyyətlərarası layihələrə imza atdığını qeyd edib. Bildirib ki, dini fikirlər dünyanın hər bir yerində inkişaf səviyyəsindən asılı olaraq dəyişir. Dinlər arasında dialoqun multikultural anlayışın təbliğində böyük rol oynadığını qeyd edən natiq dinin siyasət deyil, mədəniyyət olduğunu vurğulayıb.

İngiltərədəki “1001 ixtira” qeyri-hökumət təşkilatının direktoru Ahmed Salim dünyada müfəssəl təhsil sistemi qurmaq üçün mənsubiyyətindən asılı olmayaraq hər millətin nümayəndəsinə eyni səviyyədə qayğı göstərilməsinin vacibliyini vurğuladı. Bunun insanlar arasında anlaşılmazlıq kompleksinin aradan qalxmasında böyük rolu olacağını diqqətə çatdırdı.

İclasda çıxış edən Sibir Federal Universitetinin beynəlxalq əməkdaşlıq administrasiyasının rəhbəri Olqa Kuznetsova təmsil etdiyi qurum barədə məlumat verib. Sibir Universitetinin Rusiyada yaranan 10 federal universitetdən biri olduğunu deyən O.Kuznetsova bu ali məktəbdə xarici tələbələrin də təhsil aldıqlarını bildirib. Universitetdə fəaliyyət göstərən dil və mədəniyyət mərkəzlərində mənsubiyyətindən asılı olmayaraq hər kəsin öz mədəniyyətini nümayiş etdirmək imkanının olduğunu qeyd edib.

Tədbirdə çıxış edən Azərbaycanın təhsil nazirinin müavini Firudin Qurbanov ölkəmizdə təhsil sahəsində aparılan islahatlardan danışıb. Azərbaycanda prioritet sahələrdən olan təhsilin inkişafına xüsusi önəm verildiyini qeyd edən nazir müavini bildirib ki, Prezident İlham Əliyevin Sərəncamı ilə təsdiq edilmiş Azərbaycan Respublikasında təhsilin inkişafı üzrə Dövlət Strategiyasına uyğun olaraq bu istiqamətdə sistemli işlər həyata keçirilir. Ölkəmizin təhsil sistemini təkmilləşdirmək, Azərbaycanın iqtisadi və sosial maraqlarını təmin edəcək mütəxəssislər yetişdirmək əsas məqsədlərdəndir.

F.Qurbanov bildirib ki, son 10 ildə ölkəmizdə təhsil infrastrukturunun müasirləşdirilməsi istiqamətində də böyük işlər görülüb. Həmin müddətdə 3 mindən çox yeni məktəb tikilib və ya təmir olunub. Bütün təhsil müəssisələri avadanlıqlarla təchiz olunub, məktəblərdə tədris şəraiti daha da yaxşılaşdırılıb. Azərbaycan gənclərinin xaricdə təhsilinə dair Dövlət Proqramı çərçivəsində indiyədək 3 min azərbaycanlı gənc dövlət büdcəsi hesabına maliyyələşdirilməklə dünyanın tanınmış universitetlərində ali təhsil almağa göndərilib.

İclas işini mövzu ətrafında müzakirələrlə davam etdirib.