QRANT MÜQAVİLƏSİ İMZALANMIŞDIR
Layihənin dəyəri 70 min 713 ABŞ dolları məbləğindədir. Layihə çərçivəsində daşqın nəticəsində zərər çəkmiş 6 rayon üçün su xlorlaşdırıcı qurğuların və su nasoslarının alınması nəzərdə tutulmuşdur.
Müqavilədə bildirilir ki, “Ot kökləri və insan təhlükəsizliyi” qrant proqramı Yaponiya hökuməti tərəfindən bir çox ölkələrin inkişafını dəstəkləmək məqsədilə həyata keçirilir. Bu proqram çərçivəsində Yaponiya səfirliyi qeyri-hökumət təşkilatları, bələdiyyələr, tibb və təhsil müəssisələri tərəfindən həyata keçirilən, Azərbaycan xalqının həyat səviyyəsinin yüksəlməsinə yönəldilmiş və geniş əhalinin tələbatını birbaşa ödəyən sosial-iqtisadi inkişaf layihələri üçün vəsait ayırır. Belə layihələr səhiyyə, ibtidai və orta təhsil, sosial müdafiə, ekologiya, yoxsulluğun azaldılması və gəlirlərin artırılması sahələrində yerinə yetirilir.
Bu proqram Azərbaycan Respublikasında 2000-ci ildən həyata keçirilir və maliyyələşdirilmiş layihələrin ən iri məbləği 2002-ci maliyyə ilində olmuşdur. Bu layihələrə 3 milyon dollardan artıq vəsait ayrılmışdır.
Söhbət zamanı Abid Şərifov Yaponiya hökumətinə və səfirə minnətdarlığını bildirərək dedi ki, Azərbaycan Respublikası baş vermiş təbii fəlakətlə bağlı bir neçə dövlətə müraciət etmişdi. Yaponiya respublikamızın müraciətinə müsbət cavab verən ilk ölkədir. Bu ölkə Azərbaycana həmişə kömək göstərmişdir.
A.Şərifov dedi ki, Kürdə və Arazda, dağ çaylarında daşqınların baş verməsi, sellər əmələ gəlməsi nəticəsində 9 minədək evi su basmış, bir sıra rayonlarda əkin sahələri, müəssisələr, məktəblər, xəstəxanalar bərbad hala düşmüş, kommunikasiyalar, təmizləyici qurğular, kanalizasiya sistemləri sıradan çıxmışdır.
Yaponiya səfirliyi ilə razılaşdırılmış içməli suyu təmizləmək, xlorlaşdırmaq məqsədilə avadanlıq alınması və quraşdırılması nəzərdə tutulmuşdur. Bunlar 70 min dollar həcmində vəsait tələb edir. Biz bilirik ki, Yaponiya hökuməti belə yardımları əsasən qeyri-hökumət təşkilatlarına göstərir. Amma siz bilavasitə Azərbaycan hökumətinə yardım ayırmısınız. O, səfiri əmin etdi ki, ayrılmış qrantdan təyinatı üzrə istifadə ediləcəkdir.
SəfirToşiyki Fucivara dedi ki, təbii fəlakətin nə demək olduğunu Yaponiyada yaxşı bilirlər. Ölkəmizdə zəlzələ, tayfun, daşqınlar az olmamışdır. Biz belə hadisələrdən zərər çəkənlərin normal həyata qayıtmasını arzulayırıq.
İmzalanma mərasimində Meliorasiya və Su Təsərrüfatı Komitəsinin sədri, Respublika fövqəladə hallar üzrə komissiyası sədrinin birinci müavini Əhməd Əhmədzadə iştirak etmişdir.
Bölmənin digər xəbərləri
