QUBADLILILAR DOĞMA YURDLARINA QAYIDACAQLARINA ƏMİNDİRLƏR
Əlverişli coğrafi mövqeyi, gözəl təbiəti, əməksevər insanları ilə seçilən Qubadlı daşnak separatçıları və onların xarici havadarlarının bədnam niyyətlərinin reallaşmasına qarşı cəsurluqla müqavimət göstərmiş, doğma torpaqların müdafiəsi uğrunda 283 igid övladını qurban vermişdir. Onların 7 nəfəri Azərbaycanın Milli Qəhrəmanı adına layiq görülmüşdür. Hazırda 14 min hektaradək əkinəyararlı torpaq, 62 idarə və müəssisə, 10 mədəniyyət evi, onlarla məktəb, xəstəxana, ticarət və ictimai iaşə müəssisəsi, digər mühüm obyektlər erməni tapdağındadır. Qubadlılılar respublikanın 47 bölgəsində müvəqqəti məskunlaşmışlar. Onların əksər hissəsi Sumqayıtda yaşayır.
AZƏRTAC xəbər verir ki, avqustun 31-də Sumqayıtın Şəhidlər xiyabanı kompleksində keçirilən anım mərasimində bu faktlar bir daha yada salınmış, Qubadlının igid oğullarının ruhuna dualar oxunmuşdur. Xiyabanda uyuyan 33 Qubadlı sakininin, vətən uğrunda canından keçən digər soydaşlarımızın əziz xatirəsi ehtiramla yad olunmuş, onların məzarları üzərinə tər qərənfillər düzülmüşdür. Sahil bağındakı “Ana” abidəsinin qarşısına Qubadlı rayon ictimaiyyəti adından əklil qoyulmuşdur.
Qubadlının işğal günü ilə bağlı mərasimin iştirakçıları - Sumqayıtda müvəqqəti məskunlaşmış məcburi köçkünlər ölkəmizin ərazi bütövlüyü naminə hər şeyə hazır olduqlarını bəyan etmişlər. Bildirmişlər ki, çətinliklərə baxmayaraq, taleyin hökmü ilə doğma ocaqlarından didərgin salınmış digər soydaşlarımız kimi, onlar da öz əzəli torpaqlarına qayıdacaqlarına əmindirlər. Onlarda bu inamı Azərbaycan Prezidenti İlham Əliyevin yeritdiyi məqsədyönlü xarici siyasət yaradır.
Bölmənin digər xəbərləri
