Quba, 13 sentyabr, Elxan Yusifli, AZƏRTAC

Bilik günü ərəfəsində Quba rayonunda Dəyanət İsmayılov adına Çiçi kənd tam orta məktəbinin yeni modul tipli binası istifadəyə verilib.

AZƏRTAC-ın bölgə müxbiri xəbər verir ki, 126 şagird yerlik məktəb binasında 9 sinif və digər təyinatlı otaqlar var. Modul tipli bina yanğın xəbərdarlıq sistemi, işıq və su təchizatı ilə təmin olunub.

Məktəbin açılış mərasimində Quba Rayon İcra Hakimiyyətinin başçısı İlqar Mahmudov, Quba-Xaçmaz Regional Təhsil İdarəsinin müdiri Coşqun Əliyev çıxış edərək, müəllim və şagirdləri yeni məktəb binasının açılışı münasibətilə təbrik edib, onlara təhsildə uğurlar arzulayıb.

Çıxış edənlər ölkəmizdə həyata keçirilən təhsil siyasəti, ölkə təhsilinin qabaqcıl dünya təhsil sisteminə inteqrasiyası, bu sahədə müasir infrastrukturun və maddi-texniki bazanın formalaşdırılması, kadr potensialının gücləndirilməsi haqqında danışıblar.

Məktəbin müəllim kollektivi yeni məktəbin istifadəyə verilməsini valideynlərin, xüsusilə də şagirdlərin böyük sevincinə səbəb olduğunu vurğulayaraq, göstərilən diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər.