Qubernator: Rostov sakinləri ehtiyac olmadan evlərini tərk etməsinlər
Bakı, 24 iyun, AZƏRTAC
Rusiyanın Rostov vilayətinin qubernatoru Vasili Qolubev sakinləri sakit olmağa və lüzumsuz yerə evlərini tərk etməməyə çağırıb.
AZƏRTAC xəbər verir ki, bu barədə o, özünün teleqram kanalında məlumat yayıb.
“Mövcud vəziyyət asayişi qorumaq üçün bütün qüvvələrin maksimum cəmləşməsini tələb edir. Hüquq-mühafizə orqanları rayon sakinlərinin təhlükəsizliyini təmin etmək üçün lazım olan hər şeyi edir. Hər kəsdən sakit olmağı və lüzumsuz yerə evdən çıxmamağı xahiş edirəm”, - o bildirib.
Qeyd edək ki, bundan əvvəl Yevgeni Priqojinin teleqram kanalında bir neçə səs yazısı yerləşdirilmişdi. O, bölmələrinin hücuma məruz qaldığını iddia edib və buna görə ölkənin hərbi rəhbərliyini günahlandırıb. Y.Priqojin müdafiə naziri Sergey Şoyqu ilə hesablaşmaq üçün 25 minlik dəstəsi ilə Rostovdan Moskvaya doğru hərəkət etdiyini bildirib.
Bu bəyanatlarla əlaqədar Rusiya Federal Təhlükəsizlik Xidməti silahlı üsyana çağırış faktı ilə bağlı cinayət işi açıb. Müdafiə Nazirliyi “Vaqner”in arxa düşərgələrinə zərbə endirilməsi ilə bağlı iddiaları yalan məlumat adlandırıb.
Rusiya Federal Təhlükəsizlik Xidmətinin İctimaiyyətlə Əlaqələr Mərkəzi özəl hərbi şirkətin döyüşçülərini hücumlardan çəkinməyə çağırıb.
Prezidentin mətbuat katibi Dmitri Peskov bildirib ki, Vladimir Putinə vəziyyətlə bağlı məlumat verilib və lazımi tədbirlər görülür.
Bölmənin digər xəbərləri
