“QUŞ QRİPİ” İLƏ BAĞLI MONİTORİNQ BAŞA ÇATMIŞDIR
Dövlət Baytarlıq Xidmətinin Mətbuat Xidmətindən AZƏRTAC-a bildirmişlər ki, “quş qripi” ilə bağlı Səhiyyə, Ekologiya və Təbii Sərvətlər nazirlikləri ilə birgə keçirilən monitorinq başa çatmışdır. Abşeron yarımadasında, Dəvəçi, Salyan, Ağcabədi, Lənkəran rayonlarındakı qoruqlarda və dəniz sahili zonalarda seçmə yolu ilə 36 baş çöl quşundan qan və patoloji material, şəxsi və quşçuluq təsərrüfatlarından isə 1918 qan nümunəsi götürülərək, müayinə üçün respublika baytarlıq laboratoriyasına verilmişdir. Təqdim olunan nümunələr üzərində müayinə işi aparılır və yekun nəticələr bir həftəyə bəlli olacaqdır.
Monitorinq keçirilən ərazilərdə ölü və xəstə quş cəsədlərinə rast gəlinməmişdir.
Xatırladaq ki, ölkədə bu xəstəliyin köçəri quşlar vasitəsilə yayıla bilməsi ehtimalı qaldığına görə, belə quşların ovlanmasına, satılmasına, qida məhsulu kimi istifadə olunmasına qoyulan qadağa götürülməmişdir.
