Qusar Dövlət Ləzgi Dram Teatrı “Yeni müdir” tamaşasını təqdim edib
Qusar, 16 fevral, Elxan Yusifli, AZƏRTAC
Qusar Dövlət Ləzgi Dram Teatrı Mirzəli Rüstəmovun “Yeni müdir” tamaşasını teatrsevərlərə təqdim edib.
AZƏRTAC-ın bölgə müxbiri xəbər verir ki, ləzgi dilində oynanılan tamaşanın quruluşçu rejissoru Bağır Əhmədov, rəssamı Bədəl Bədəlov, musiqi tərtibatçısı Şaiq Qardaşovdur.
Qusar rayon Mədəniyyət Mərkəzində ilk dəfə təqdim olunan səhnə əsərində rolları aktyorlar Arzu Məmmədrzayeva, Elnur Hacıyev, Yeganə Kərimova, Emma Xeyirbəyova, Diana Cəfərova, Malik Ramazanov, Tofik Mustafayev, Ramella Rzayeva, Mirzə Salmanov, Romik Maxsudov, Romik Davudov, Tərlan Cəbrayılov və başqaları ifa ediblər.
Zəngin səhnə dekorasiyası və aktyorların məharətli çıxışı ilə baxımlı olan səhnə əsəri tamaşaçılar tərəfindən maraqla qarşılanıb.
Teatrın direktoru Faiq Qardaşov bildirib ki, hazırda Mirzə Fətəli Axundzadənin “Hacı Qara” komediyası və Vüqar Haqverdiyevin “Saçları səməni oğlan” əsərlərinin məşqləri davam edir. Mövsüm ərzində teatr şimal bölgəsinin bütün rayonlarında, həmçinin Bakı, Şəki, Lənkəran və Mingəçevirdə qastrol səfərləri ilə çıxış edəcək.
Bölmənin digər xəbərləri
