RABİTƏ VƏ İNFORMASİYA TEXNOLOGİYALARI NAZİRLİYİNDƏ MƏTBUAT KONFRANSI
Nazir Əli Abbasov ABŞ-da keçirilən görüşlər barədə ətraflı məlumat verərək bildirmişdir ki, məqsəd yaradılması planlaşdırılan yüksək texnoloji tutumlu xüsusi iqtisadi zonaların problemlərini, perspektivlərini ABŞ dövlət və hökumət nümayəndələri, həmçinin iş adamları, təhsil nümayəndələri ilə müzakirə etmək idi. Səfər müddətində rabitə sahəsində fəaliyyət göstərən qurumlarda görüşlər keçirilmiş, müzakirələr aparılmışdır. Nazir Vaşinqtonda “USTDA”, “SPR” şirkətlərinin, ABŞ-ın Kommersiya Departamenti, ABŞ-Azərbaycan Ticarət Palatası, Azərbaycanın ABŞ-dakı səfirliyinin birgə təşkilatçılığı ilə keçirilmiş informasiya-kommunikasiya texnologiyaları (İKT) üzrə biznes-forumda və Kaliforniya ştatının San Xose şəhərində təşkil edilmiş İKT üzrə I ABŞ-Azərbaycan biznes-forumunda əsas məruzəçi kimi çıxış etmişdir. O, Kaliforniyada texnoparkların yaradılmasında böyük təcrübəsi olan Stenford Universitetinin Beynəlxalq Tədqiqat Mərkəzində xüsusi iqtisadi zonaların formalaşdırılması təcrübəsi ilə yaxından tanış olmuşdur.
Daha sonra Əli Abbasov “Microsoft”un Sietl şəhərində yerləşən Baş qərargahında şirkətin vitse-prezidenti Stiv Barmerlə və digər rəhbər işçilərlə görüşüb “Microsoft”un Azərbaycanda yeni fəaliyyəti haqqında müzakirələr aparmışdır.
Sonda jurnalistləri maraqlandıran suallara cavab verilmişdir.
