Radiasiya Problemləri İnstitutu iş rejimini mövcud şəraitə uyğunlaşdırıb
Bakı, 23 aprel, AZƏRTAC
Dünyanı narahat edən koronavirus epidemiyası səbəbindən AMEA-nın alimləri “Evdə qal” kampaniyasına qoşularaq elmi fəaliyyətlərini onlayn davam etdirirlər. Radiasiya Problemləri İnstitutu da iş rejimini mövcud şəraitə uyğunlaşdıraraq məsafədən həyata keçirir. Bu barədə elmi müəssisənin direktoru, AMEA-nın müxbir üzvü Oqtay Səmədov müsahibəsində məlumat verib.
AMEA-dan AZƏRTAC-a bildirilib ki, alim rəhbərlik etdiyi elmi qurumda aparılan tədqiqatlardan danışıb. Qeyd edib ki, institutun əməkdaşları təcrübi tədqiqatlarını 2020-ci ilin planına uyğun olaraq davam etdirə bilməsələr də, digər tədqiqatların nəticələrinin araşdırılması ilə məşğul olur, onlayn müzakirələr keçirir və məqalələr hazırlanması üzrə müvafiq işlər görürlər: “Hazırda institutda respublikamızın müxtəlif bölgələrinin torpaq və su hövzələrində, istehsalat sahələrində təbii radioaktiv izotopların paylanma xüsusiyyətləri və radiasiya təhlükəsizliyi üzrə tədqiqatlar aparılır. 2020-ci ilin əvvəlində elmi-tədqiqat planına uyğun olaraq bölgələrdə aparılmış araşdırmaların nəticələri işlənilir, radiasiya təhlükəsizliyi üzrə tövsiyələr hazırlanır”.
Oqtay Səmədov vurğulayıb ki, əməkdaşlar onlayn keçirilən beynəlxalq seminar və konfranslara qatılır, AMEA-nın Mərkəzi Elmi Kitabxanasının veb-səhifəsində yaradılan imkanlardan, dünya kitabxanalarının pandemiya dövründə virtual rejimdə təqdim etdikləri resurslardan, nəşrlərin PDF və e-pub formatlarından geniş istifadə edərək elmi məqalələr üzərində işləyirlər.
İnstitutun ingilis dilində nəşr olunan “Radiation Researches” jurnalına hazırlıq işlərindən bəhs edən direktor növbəti nömrə üçün təqdim edilən məqalələrin bu günlərdə onlayn olaraq mütəxəssislərə rəyə göndərildiyini, həmçinin alınan rəylər üzrə məqalə müəllifləri ilə müzakirələr aparıldığını vurğulayıb.
Alim bildirib ki, mövcud şəraitə uyğun olaraq müəssisədə radiasiya materialşünaslığı və təbii və fizioloji fəal maddələr kimyası ixtisasları üzrə təhsil alan I və II kurs magistrantlar üçün dərslərin distant formada tədrisinə başlanılıb. Hər iki ixtisas üzrə II kurs magistrantların, həmçinin elmi-pedaqoji rəhbərlərin iştirakı ilə distant təcrübə keçirilir. II kurs tələbələri elmi rəhbərləri ilə onlayn əlaqə saxlayaraq dissertasiya mövzuları üzərində işlərini davam etdirirlər.
“Bununla yanaşı, institut alimləri koronavirusun yaranma və yoluxma səbəbləri, virusla xəstələnən insanlarda sağaldıqdan sonra onun qoyduğu izlərin proqnozu ilə əlaqədar araşdırma aparır, pandemiyadan sonrakı dövr üçün tədqiqat istiqamətlərini müəyyənləşdirirlər”, - deyə Oqtay Səmədov bildirib.
Sonda direktor vurğulayıb ki, Prezident İlham Əliyevin vaxtında gördüyü genişmiqyaslı və qabaqlayıcı tədbirlər, sosial sahədə verdiyi qərarlar, yaradılan Operativ Qərargah, səhiyyə sahəsinə ayrılan maliyyə vəsaiti ölkəmizin bəşəriyyət üçün böyük bəla olan COVID-19 pandemiyasından ən az zərərlə çıxmasına zəmin yaradıb.
Bölmənin digər xəbərləri
