Regionda hərbi eskalasiyanın bütün məsuliyyəti Ermənistanın üzərinə düşür
Bakı, 31 avqust, AZƏRTAC
Ermənistan işğalçılıq niyyətinə uyğun olaraq təxribatlarının sayını artırır. İyul ayında Tovuz rayonunda hərbi təxribatın törədilməsi, Goranboy rayonu istiqamətində erməni diversiya qrupunun hücum cəhdi, Paşinyanın Qarabağa getməsi və Azərbaycan ictimaiyyətini qıcıqlandırmaq məqsədilə bilərəkdən işğalçı ordunun nümayəndələrini təltif etməsi böyük bir təxribat planının tərkib hissəsidir. Görünür, Ermənistanın məqsədi Azərbaycanı müharibəyə təhrik etməkdir. Əlbəttə, bütün bu addımlara görə ümumilikdə regionda siyasi və hərbi eskalasiyanın məsuliyyəti Ermənistanın üzərinə düşür.
Bu sözləri AZƏRTAC-a açıqlamasında Yeni Azərbaycan Partiyası Nizami rayon təşkilatının sədri, Milli Məclisin deputatı Sədaqət Vəliyeva deyib.
Ermənistanın regionda təhdid mənbəyi kimi bütün dünyada ifşa edilməli olduğunu bildirən Sədaqət Vəliyeva deyib: “Paşinyan ailəsinin hakimiyyətinin silah, narkotik, qiymətli daşlar alverində vasitəçilik etməsi, Yaxın Şərq regionunda terrorçulara silah ötürülməsində Ermənistanın tranzit ölkəyə çevrilməsi, Qarabağın narkotacirlərin keçidi kimi “boz zona”ya və narkotiklərin yetişdirilməsi üçün plantasiyaya çevrilməsi beynəlxalq səviyyədə araşdırma tələb edən cinayətlərdir. Xüsusilə də son vaxtlar Yaxın Şərqdən, Livandan ermənilərin Qarabağa köçürülməsi məsələsi diqqətdə saxlanılmalıdır. Ədalət, demokratiya, sülh, əməkdaşlıq axtarışında olan beynəlxalq təşkilatlar bu qanunsuzluqlara reaksiya verməlidirlər. Kim zəmanət verə bilər ki, Livandan köçürülənlər Paşinyanın könüllü hərbi birləşmələrində xidmət etməyəcəklər? Kim deyə bilər ki, sabah həmin livanlılar Azərbaycan Ordusuna atəş açmayacaqlar? Suallar yetərincə çoxdur və beynəlxalq təşkilatların da ilk vəzifəsi Cənubi Qafqaz regionunun təhlükəsizliyinə təhdid yaradan Ermənistanla məşğul olmaq olmalıdır. Yalançı hesabatlarla Ermənistanı tərifləmək əvəzinə, bu ölkənin cinayətlərini ifşa etməklə məşğul olmalıdırlar. Azərbaycana “demokratiya”, “insan hüquqları” adı altında təzyiq etmək əvəzinə, 1 milyondan çox qaçqın və məcburi köçkünün vəziyyəti ilə maraqlanmalıdırlar. Sual verməlidirlər ki, nə üçün Ermənistan 30 ildir azərbaycanlıları soyqırımına, işğala məruz qoyur, insanların doğma yurduna qayıtmaq hüququnu pozur?”.
“Bu gün artıq hər kəs bilir ki, Paşinyanın babası faşist ideologiyasının daşıyıcısı olub. Bu gün, eyni zamanda, ermənilərin abidəsindən mənəvi qida aldıqları Njde də faşist olaraq hərbi cinayətlərdə iştirak edib”, - deyən Sədaqət Vəliyeva bildirib ki, Paşinyanın babası və Njde kimi faşistlər işğal edilmiş ərazilərdə mülki əhalinin, xüsusilə də yəhudilərin soyqırımı prosesində iştirak ediblər. “Hər kəsə bəllidir ki, bir neçə il əvvəl Ermənistanda faşist cəllad Njde ləqəbi ilə məşhur olan Qaregin Ter-Arutyunyana 6 metr hündürlüyündə heykəl qoyuldu. Heykəlin açılışında bu ölkənin keçmiş prezidenti iştirak etdi. Təsəvvür edin, Ermənistanda 6 metr hündürlüyündə heykəli qoyulmuş Qaregin Njde müharibə dövründə deyirdi ki, Almaniya uğrunda həlak olan Ermənistan uğrunda həlak olur. Təsadüfi deyil ki, müharibədən sonra o, SMERŞ tərəfindən həbs olunub, 25 il azadlıqdan məhrum edilib və Vladimir həbsxanasında ölüb. Belə bir adamı qəhrəmanlaşdırmaq təbii ki, faşizm ideologiyasına ehtiramdan irəli gəlir. Məhz Ermənistan hakimiyyətində təmsil olunanların faşist babalarından ibrət götürmələrini, onların əməllərini davam etdirmələrinin ən bariz nümunəsi də Xocalı soyqırımıdır. Ona görə də onların bugünkü təxribatlarına təəccüblənmək yox, kəskin adekvat cavab vermək siyasi-hərbi tələbə çevrilir”, - deyə deputat bildirib.
Bölmənin digər xəbərləri
