Moskva, 26 sentyabr, AZƏRTAC

Moskva Dövlət Universitetində (MDU) I Rusiya-Azərbaycan Elm və Təhsil Forumunun açılışı olub.

AZƏRTAC xəbər verir ki, tədbirdə iki ölkənin universitetlərinin nümayəndələri iştirak edirlər.

Forumu açan MDU-nun rektoru, akademik Viktor Sadovniçi tədbirin təşkilinə göstərdiyi dəstəyə görə Azərbaycan Milli Elmlər Akademiyasının vitse-prezidenti, MDU-nun Bakı filialının rəhbəri Nərgiz Paşayevaya minnətdarlığını bildirib.

V.Sadovniçi çıxışında elm və təhsil sahəsində Rusiya-Azərbaycan əlaqələrinin dərin təhlilini apararaq, onların ənənəvi olaraq qarşılıqlı anlaşma və etimada əsaslandığını vurğulayıb. O, Rusiya Prezidenti Vladimir Putinlə Azərbaycan Prezidenti İlham Əliyev arasında etimad zəminində aparılan dialoqu xüsusi qeyd edib.

Rektor SSRİ-də məsul vəzifələrdə çalışarkən o dövrün ən mühüm layihələrinə şəxsən rəhbərlik edən Azərbaycan xalqının Ümummilli Lideri Heydər Əliyevin böyük təşkilatçılıq rolunu xatırladıb. O, Heydər Əliyevlə şəxsən tanış olduğunu və onunla çox səmimi, mehriban münasibətlərini qeyd edib. 1982-1987-ci illərdə SSRİ Nazirlər Soveti Sədrinin birinci müavini vəzifəsində çalışan Heydər Əliyev ölkədə təhsil sisteminin inkişafı ilə məşğul olub, Moskva Dövlət Universitetinə dəfələrlə mühüm dəstək göstərib. Xüsusən, onun tapşırığı ilə Moskva Dövlət Universitetində təhsilin inkişafı planı qəbul edilib. Həmin dövrdə V.Sadovniçi MDU-nun birinci prorektoru kimi bu planı əlaqələndirib. Heydər Əliyevin müstəsna xidmətlərini nəzərə alaraq, dahi şəxsiyyətə Moskva Dövlət Universitetinin Fəxri professoru adı verilib. Rektor əlavə edib ki, universitet Azərbaycan xalqının dahi oğlunun xatirəsini yüksək ehtiramla yad edir.

V.Sadovniçi əlavə edib: “Əsası Heydər Əliyev tərəfindən qoyulmuş bu xoş ənənələr respublikanın hazırkı rəhbərinin dövründə də davam etdirilir. İlham Əliyev də Azərbaycanın inkişafı, xüsusilə elm və təhsil sahəsində tərəqqisi istiqamətində çox iş görüb. Bu töhfələri, habelə Rusiya ilə Azərbaycan arasında əlaqələrin möhkəmləndirilməsində müstəsna xidmətlərini nəzərə alaraq, 2008-ci ildə İlham Əliyev Moskva Dövlət Universitetinin Fəxri professoru adına layiq görülüb”.

Rektorun sözlərinə görə, universitet bu gün Azərbaycanla əməkdaşlığın inkişafı proqramlarını fəal şəkildə həyata keçirir. Moskva Dövlət Universitetinin Asiya və Afrika Ölkələri İnstitutunda tələbələr Azərbaycan dilini və mədəniyyətini öyrənir, Azərbaycana həsr olunmuş dərsliklər, kitablar nəşr olunur. Ölkələrimiz arasında təhsil sahəsində ən böyük layihə 2008-ci ildə fəaliyyətə başlayan Moskva Dövlət Universitetinin Bakı filialıdır. Bu ali təhsil müəssisəsi İlham Əliyevin təşəbbüsü ilə yaradılıb.

Akademik vurğulayıb ki, Azərbaycanın Birinci vitse-prezidenti Mehriban Əliyeva ölkənin mədəniyyətinə və təhsilinə dəstək istiqamətində böyük işlər görür. Rektor, həmçinin Rusiyanın Azərbaycanlı Gənclər Birliyinin, şəxsən Heydər Əliyev Fondunun vitse-prezidenti Leyla Əliyevanın ikitərəfli əlaqələrə verdiyi töhfələrdən də danışıb.

Fəridə Abdullayeva

AZƏRTAC-ın xüsusi müxbiri

Moskva