İQTİSADİYYAT
Rəqabət şəraitində keçən hərracda 18 nəqliyyat vasitəsi satılıb
Bakı, 25 oktyabr, AZƏRTAC
İqtisadiyyat Nazirliyi yanında Əmlak Məsələləri Dövlət Xidməti tərəfindən keçirilən növbəti hərracda 18 nəqliyyat vasitəsi satılıb.
Dövlət Xidmətindən AZƏRTAC-a bildirilib ki, hərrac rəqabət şəraitində keçib. Belə ki, “Toyota Camry” markalı avtomobilin start qiyməti 9 min manat olsa da, sonda 15 min manata qədər yüksəlib. Start qiyməti 3500 manat olan “QAZ 3302-18 Yük” markalı nəqliyyat vasitəsi 7035 manata özəlləşdirilib.
Hərracda satılan nəqliyyat vasitələrinin siyahısı ilə https://bit.ly/3tDcF3l linki vasitəsilə keçid etməklə tanış olmaq olar.
Cari ay üzrə növbəti hərrac oktyabrın 31-də keçiriləcək. Hərraca 11 kiçik müəssisə, 2 yarımçıq tikili və 20 nəqliyyat vasitəsi çıxarılacaq. İştirak etmək istəyənlər Xidmətin rəsmi saytından (emlak.gov.az) və ya Özəlləşdirmə portalından (privatization.az) hərraca çıxarılan dövlət əmlakı üzrə seçim edə bilər. Elektron Xidmətlər Portalında (e-emlak.gov.az) qeydiyyatdan keçməklə, dövlət əmlakının ilkin hərrac qiymətinin 10 faizi məbləğində behi ödəyərək iştirakçı statusu almaq olar.