RESPUBLİKA BAŞ PROKURORLUĞU VƏ DAXİLİ İŞLƏR NAZİRLİYİ MƏTBUAT XİDMƏTLƏRİNİN MƏLUMATI
Baş vermiş cinayət hadisəsi ilə əlaqədar dərhal rayonun hüquq mühafizə orqanlarının əməkdaşlarından ibarət əməliyyat-istintaq qrupu yaradılmışdır. Həyata keçirilmiş təxirəsalınmaz tədbirlərlə cinayətin “isti izlərlə” açılması təmin edilmiş və qətlin şəxsi münasibətlər zəminində qisas məqsədi ilə həmin rayonun sakini Firudin Kərimov tərəfindən törədildiyi müəyyən olunmuşdur.
Araşdırmalar göstərmişdir ki, qətlə yetirilmiş Qalib Bəkirovun qardaşı Eldar Bəkirov hələ 2000-ci ilin dekabr ayında Firudin Kərimovdan zor tətbiq etmək hədəsi ilə 3000 (üç min) ABŞ dolları tələb etmiş, lakin sonuncu bundan imtina etdiyi üçün bıçaqla onun sifətini eybəcərləşdirməklə sağlamlığına ağır zərər vurmuşdur.
Zərərçəkən Firudin Kərimovun şikayəti əsasında fakt üzrə həmin gün Azərbaycan Respublikası CM-in 181.2.3-cü (ağırlaşdırıcı hallarda hədə-qorxu ilə tələbetmə) maddəsi ilə cinayət işi başlanıb istintaq aparılmışdır. Eldar Bəkirov törətdiyi bu əmələ, habelə rayon sakini Cahid Əhmədovdan hədə-qorxu ilə pul tələb etdiyinə və tələbi yerinə yetirmədiyi üçün sonuncunu da öldürməyə cəhd etdiyinə görə Azərbaycan Respublikası CM-in 29, 120 və sair maddələri ilə təqsirli bilinərək, məhkəmənin hökmü ilə azadlıqdan məhrumetmə cəzasına məhkum olunmuşdur.
Qardaşının məhz Firudin Kərimovun şikayəti əsasında həbs olunduğunu bəhanə edən Qalib Bəkirov 2005-ci ilin dekabr ayında ondan 10.000 (on min) ABŞ dolları tələb etmiş və əks təqdirdə sifətini daha da eybəcərləşdirəcəyi ilə hədələyərək, ona iki ay vaxt vermişdir. 2006-cı il martın 5-də Qalib Bəkirov Firudin Kərimovla görüşərək, verilən vaxtın başa çatdığını xatırlatmışdır.
Firudin Kərimov hədələrin real olduğunu anlasa da, bu barədə hüquq mühafizə orqanlarına müraciət etmək istəməmişdir. O, qisas almaq üçün ov tüfəngi əldə edərək, ertəsi gün Ağsu şəhərinin mərkəzində yerləşən parkdakı çayxanaya gəlmiş və yaxın məsafədən iki dəfə atəş açaraq, Qalib Bəkirova ölümlə nəticələnən ağir bədən xəsarəti yetirmişdir.
Azərbaycan Respublikası CM-in 120.1-ci maddəsində nəzərdə tutulan cinayəti törətdiyinə görə, 2006-cı il martın 7-də Firudin Kərimova ittiham elan edilərək, Ağsu rayon məhkəməsinin qərarı ilə barəsində həbs qətimkan tədbiri seçilmişdir.
Qətlin şəxsi münasibətlər zəminində və qisas məqsədi ilə törədildiyinin ibtidai istintaqla tam sübuta yetirilməsinə baxmayaraq, son günlər radikal müxalifəti təmsil edən ayrı-ayrı mətbuat orqanlarında Qalib Bəkirovun öldürülməsinin guya onun Azərbaycan Milli Demokrat Partiyası yerli təşkilatının sədri kimi siyasi fəaliyyəti ilə bağlı olması barədə həqiqətə uyğun olmayan yazılar dərc edilir.
Respublikanın Baş Prokurorluğu və Daxili İşlər Nazirliyi “Kütləvi informasiya vasitələri haqqında” Azərbaycan Respublikası Qanununun 10-cu maddəsini rəhbər tutaraq, faktlara söykənməyən yalan və qərəzli yazıların yayılmasının, eləcə də yanlış ictimai fikir formalaşdırma cəhdlərinin yolverilməz olduğunu bildirir və belə hərəkətlərin qanunvericiliklə müəyyən edilmiş qaydada məsuliyyət doğurduğu haqda aidiyyəti kütləvi informasiya vasitələrinin rəhbərlərini xəbərdar edir.
