RESPUBLİKA OLİMPİYA-İDMAN LİSEYİNDƏ GÜLƏŞ ZALI İSTİFADƏYƏ VERİLMİŞDİR
AZƏRTAC xəbər verir ki, oktyabrın 5-də Bakıxanov qəsəbəsində yerləşən Respublika Olimpiya-İdman Liseyində güləş zalı istifadəyə verilmişdir. Bu münasibətlə keçirilən mərasimdə liseyin direktoru Rasim Muradov yeni güləş zalının istifadəyə verilməsini idman həvəskarları üçün çox əlamətdar bir hadisə adlandırmışdır. Azərbaycanda idmanın inkişafının müstəqilliyimizin memarı, ümummilli liderimiz Heydər Əliyevin qayğısı və diqqəti sayəsində mümkün olduğunu qeyd edən R.Muradov bildirmişdir ki, bu sahənin, xüsusən də Olimpiya idman növlərinin yüksəliş dövrü İlham Əliyevin 
Milli Olimpiya Komitəsinə rəhbərlik etməsi ilə sıx bağlıdır.
Gənclər və idman naziri Azad Rəhimov 1962-ci ildə istifadəyə verilmiş məktəbin beynəlxalq səviyyəli idmançıların yetişməsində mühüm rol oynadığını vurğulamışdır. Bildirmişdir ki, məktəbin məzunları arasında bu gün bütün dünyada tanınan Xəzər İsayev və Fərid Mansurov kimi məşhur idman ustaları vardır.
Bu gün ölkəmizin idman sahəsində geniş inşaat meydanına çevrildiyini deyən A.Rəhimov, hazırda respublikada 18 olimpiya-idman kompleksinin, eləcə də Mingəçevirdə avarçəkmə bazasının və hovuz kompleksinin tikildiyini bildirmişdir.
Açılış mərasimində qeyd olunmuşdur ki, Respublika Olimpiya-İdman Liseyi fəaliyyət göstərdiyi 44 il ərzində ölkəmizə 4 Olimpiya və 6 dünya çempionu bəxş etmişdir.
Bölmənin digər xəbərləri
