Rey Kərimoğlu: Bəzən ağıla gəlməyən yerlərdə də minalara rast gəlinir
Bakı, 13 sentyabr, AZƏRTAC
Ermənistanın həyata keçirdiyi mina terrorunun miqyası ölçüyəgəlməzdir. Hesablamalara görə, işğaldan azad edilmiş ərazilərdə 1.5 milyona yaxın mina basdırılıb.
Ekspertlər hesab edirlər ki, Ermənistanın mina terroruna son qoyması üçün həmin ölkəyə qarşı ciddi tədbirlər görülməlidir. 1991-ci ildən bu günədək 3 min 385 azərbaycanlı Ermənistanın basdırdığı minaların qurbanı olub. Onlardan 357-si gənc və uşaqlar, 38-i isə qadınlardır. 2020-ci il 10 noyabr tarixli üçtərəfli Bəyanatdan sonra isə azad edilmiş ərazilərdə mina səbəbindən 55 nəfər həyatını itirib, 251 nəfər isə yaralanıb. Bunlar Ermənistanın Azərbaycana qarşı sistemli və məqsədyönlü şəkildə mina terror siyasətinin dəhşətli rəqəmləridir.
Ekspertlər bildirir ki, işğaldan azad edilmiş ərazilərdə bəzən 1 kvadratmetr ərazidən 6-8 ədəd piyada əleyhinə mina aşkarlanır. Bir çox hallarda tələ minalara da rast gəlinir. Səbəb isə məlumdur. Daha çox insanın yaralanmasına və ölməsinə səbəb olmaq.
“Minadan Zərərçəkənlərin Assosiasiyası” İctimai Birliyinin sədri, qazi Rey Kərimoğlu AZƏRTAC-a açıqlamasında söyləyib: “Elə ərazilər var ki, bir kvadratmetrdən 6-8 piyada əleyhinə mina çıxır, çoxlu sayda mina tələlərinə rast gəlinir. Bir dəfə Suqovuşan istiqamətində monitorinq aparanda bir kvadratmetrdə 6-7 piyada əleyhinə mina gördük. Həmin ərazilər minalarla ciddi şəkildə çirklənib. Onlar mina basdırdıqları ərazilərin ətrafına dəmir qırıntıları səpiblər. Bunlar isə minatəmizləmə əməliyyatında çətinlik yaradan amillərdəndir, çünki minaaxtaran detektorun verdiyi hər bir siqnalı tədqiq etməlidir.
Onun sözlərinə görə, sentyabrın 11-i saat 08:30 radələrində Rusiya sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstələri Ordumuzun Xocavənd rayonu istiqamətində döyüş növbətçiliyi aparan hərbi qulluqçularına qarşı itdən sui-qəsdçi kimi istifadə etməklə terror aktı törətməyə cəhd göstəriblər. Bu hadisə də tələ mina ilə bağlı hadisə idi. Bəzən ağıla gələn və gəlməyən yerlərdə minaya rast gəlinir. Evlərin girişində, həyətlərdə belə mina basdırılıb. Ermənistan minalardan kütləvi şəkildə istifadə edib. Burada əsas məqsəd ermənilərin azərbaycanlılara daha çox ziyan verməsi, çoxsaylı insanın ölümünə səbəb olması, yaralanması, bununla da müəyyən xaos yaratmaq, həyata keçirilən layihələri ləngitməkdir.
Buna baxmayaraq, İkinci Qarabağ müharibəsindən sonra mina probleminin həlli dövlətin əsas prioritetlərindən biri kimi müəyyənləşdirilib. Müharibədən sonra dövlət qurumlarından əlavə, dörd yerli minatəmizləmə şirkəti və bir milli qeyri-hökumət təşkilatı bu prosesə cəlb olunub. Təkcə 2020-ci ildən bu yana işğaldan azad edilən ərazilərdə 2021-ci il Ermənistan istehsal olan 2 mindən çox piyada əleyhinə mina aşkarlanıb. Ekspertlər dünya ictimaiyyətinin bu məsələyə ciddi reaksiya verməli olduğunu deyir.
Bölmənin digər xəbərləri
