“Rheinmetall” silah şirkəti ilə Rumıniya arasında 5,7 milyard avroluq müqavilələr imzalanıb
Berlin, 2 iyun, AZƏRTAC
Rumıniya Almaniyanın müdafiə sənayesi nəhəngi olan “Rheinmetall” şirkətinə son illərdəki ən iri hərbi sifariş paketlərindən birini həvalə edib.
AZƏRTAC xəbər verir ki, Rumıniyanın Silahlanma üzrə Baş İdarəsi tərəfindən Avropa İttifaqının SAFE (Avropa üçün Təhlükəsizlik Fəaliyyəti) proqramı çərçivəsində verilən sifarişlərin ümumi dəyəri 5,7 milyard avro təşkil edir. İmzalanan müqavilələr çərçivəsində nəzərdə tutulan sifariş paketinə 298 ədəd ən yeni nəsil “Lynx” döyüş maşını, o cümlədən piyadaların döyüş maşınları, minaatan, komanda-idarəetmə və sanitar vasitələr daxildir. Bundan başqa, “Lynx” platforması əsasında “Skyranger” hava hücumundan müdafiə sistemləri, ortakalibrli sursatlar, iki dəniz patrul gəmisi və iki dalğıc dəstək gəmisi də istehsal olunacaq. Sifarişlər 2028-2030-cu illərdə çatdırılacaq.
“Rheinmetall” layihələrin icrası üçün Rumıniyadakı mövcud istehsal güclərini əhəmiyyətli dərəcədə genişləndirəcək və texnologiya transferini təmin edəcək. Şirkət ölkəyə yüzmilyonlarla avro həcmində investisiya yatırmağı planlaşdırır. İstehsalın böyük hissəsi Rumıniyada həyata keçiriləcək və layihələrə 200-dən çox subpodratçı cəlb olunacaq. Bu isə minlərlə yeni iş yerinin yaradılmasına imkan verəcək.
Bölmənin digər xəbərləri
