RUS MÜNHAUZENİ 8 MART BAYRAMINI QEYD ETMİŞDİR

09.03.2006 [18:57]
Çap et
A⁺ A^-

AZƏRTAC “İnterfaks” agentliyinə istinadla xəbər verir ki, rəsmən məşhur baron İeronim fon Münhauzenin nəslindən sayılan Vladimir Naqovo-Münhauzen özünün hazırladığı topdan qucaq-qucaq lalə və qərənfil atəşi açaraq, 8 Mart bayramını qeyd etmişdir. Naqovo-Münhauzenin sözlərinə görə, o, Rusiyanın və bütün dünyanın qadınlarının şərəfinə səmaya atəş açmışdır ki, bayramda hər bir qadının öz təbii çiçək payı olsun. Rus Münhauzeni “Qurken-puk” adlandırdığı topdan müxtəlif nəcib məqsədlər, məsələn, bayram günləri havanı yaxşılaşdırmaq üçün istifadə edir. O demişdir: ”Bu yaxınlarda Şimal qütbünü duzlu xiyar atəşinə tutmuşam. Duzlu təam alan ağ ayılar sevinclərindən elə atılıb-düşürdülər ki, hətta qütb buzları da isindi və 8 Mart bayramınadək bizim yerlərə əsil bahar gəldi”.

Kabarda-Balkariya Respublikasındakı Proxladnoye şəhərinin sakini V.Naqovo-Münhauzen iddia edir ki, tarixi sənədlərə görə, baron Münhauzen 1739-cu ilin yayında knyaginya Qolitsına ilə tanış olmuş və onların görüşlərinin nəticəsi kimi baronun nikahdankənar qızı dünyaya gəlmişdir. Qalmaqaldan qaçmaq üçün körpəni kazak atamanı Naqovitsının ailəsinə vermişlər. Naqovo-Münhauzen həmin körpənin nəticəsidir. İnişilədək Naqovitsın soyadını daşıyan Münhauzen onu Proxladnoye şəhər məhkəməsinin müvafiq qərarından sonra dəyişdirmişdir.

Naqovo-Münhauzen bildirmişdir ki, öz məşhur əcdadına ikiyə bölünmüş almatək bənzəyir. Baronun macərapərəst xarakteri və ədəbi qabiliyyəti də irsən ona keçmişdir. Belə ki, onun “Baron Münhauzenin kötükcəsinin XX-XXI əsrlərin ayrıcında qeyri-adi macəraları” adlı kitabı da çapdan çıxmışdır.

Müasir Münhauzen şəhərdəki baxımsız su qülləsində əcdadının muzeyini yaratmış, burada baronun göyə uçduğu mərmini, ilan qabığından tikilmiş şalvarını və ailəsi üçün müqəddəs olan digər əşyaları toplamışdır.

RUS MÜNHAUZENİ 8 MART BAYRAMINI QEYD ETMİŞDİR

MÜƏLLİFLƏ ƏLAQƏ

Bölmənin digər xəbərləri