Professor Məmməd Əliyev onkologiya sahəsində mahir mütəxəssis kimi Rusiyada da, Azərbaycanda da məşhurdur. Onun elmi araşdırmaları təbabətdə mühüm səhifədir. O, çoxsaylı monoqrafiyaların, onlarca elmi məqalənin müəllifidir. Bunların bir çoxu tibb elmində yeni sözdür. Məmməd Əliyev namizədlik və doktorluq dissertasiyaları müdafiə etmiş bir çox gənc mütəxəssislərin elmi rəhbəridir. O, neçə ildir ki, Rusiya Tibb Elmləri Akademiyasının N.N.Bloxin adına Rusiya Onkologiya Mərkəzinin Elmi Tədqiqat Ümumi Onkologiya İnstitutunun cərrahiyyə şöbəsinə başçılıq edir.

Bakılı həkimlər ailəsinin övladı olan Məmməd Cavad oğlu Azərbaycan Dövlət Tibb İnstitutunda təhsil almış və həkimlik fəaliyyətinə 1980-ci ildə Bakıdakı Respublika klinik xəstəxanasında reanimatoloq-anestezioloq kimi başlamışdır.

1990-cı ildən o, Azərbaycan Onkologiya Elmi Mərkəzinin böyük elmi əməkdaşı olmuş, 1992-ci ildən tibb elmləri doktoru elmi dərəcəsi almaq üçün “Dayaq-hərəkət aparatı şişi ilə əlaqədar radikal müalicə keçmiş xəstələrin tibbi-sosial reablitasiyası” mövzusunda dissertasiyanı uğurla müdafiə etmişdir. 1998-ci ildə ona “onkologiya” ixtisası üzrə professor elmi adı verilmişdir. 1992-ci ildən 2001-ci ilədək Rusiya Tibb Elmləri Akademiyasının N.N.Bloxin adına Onkologiya Mərkəzinin Elmi Tədqiqat Ümumi Onkologiya İnstitutunun cərrahiyyə şöbəsinin aparıcı elmi əməkdaşı işləmişdir.

Tibb elminin inkişafına xüsusi töhfəsinə görə “Osteogen sarkomanın müalicəsinin kombinasiya olunmuş metodlarının hazırlanmasına və klinik praktiya tətbiqinə” görə elm və texnika sahəsində 1999-cu il RF Dövlət mükafatına layiq görülmüşdür.

Məmməd Əliyev ictimai işlərlə də məşğul olur, Ümumrusiya Azərbaycan Konqresinə başçılıq edir və Rusiyadakı Azərbaycan diasporunun sıx birləşməsinə, onun tarixi vətənlə əlaqələrinin möhkəmlənməsinə dəyərli töhfə verir.

Məşhur həkim, alim, ictimai xadim kimi Rusiyada böyük nüfuza malik olan Məmməd Əliyev Azərbaycan ilə Rusiya dövlətlərarası münasibətlərinin inkişafı və möhkəmlənməsi sahəsində səmərəli fəaliyyət göstərir.

Xatırladaq ki, Azərbaycan Respublikasının Prezidenti İlham Əliyev bu yaxınlarda Moskvaya rəsmi səfəri zamanı Azərbaycan diasporunun nümayəndələri ilə görüşündə Ümumrusiya Azərbaycan Konqresinin rəhbəri kimi Məmməd Əliyevin fəaliyyətini yüksək qiymətləndirmişdir.

Soydaşımızı Rusiya Tibb Elmləri Akademiyasının müxbir üzvü seçilməsi münasibətilə təbrik edir və ona yeni uğurlar arzulayırıq.