Rusiya Finlandiyanın NATO-ya üzvlüyünü öz milli maraqlarına təhdid kimi qiymətləndirir
Moskva, 4 aprel, AZƏRTAC
Finlandiyanın NATO-ya üzv olması Rusiyanın bu ölkə ilə münasibətlərinə mənfi təsir göstərməyə bilməz.
AZƏRTAC xəbər verir ki, bu fikir Rusiya XİN-in Finlandiyanın NATO-ya üzvlüyü ilə əlaqədar yaydığı bəyanatda yer alıb. Bildirilir ki, Moskva hərbi-texniki və digər xarakterli cavab tədbirləri görmək məcburiyyətində qalır. Rusiyanın Şimal-Qərb sərhədlərində müdafiə tədbirləri Finlandiyanın Şimali Atlantika Alyansına inteqrasiyasının şərtlərindən, o cümlədən NATO hərbi infrastrukturunun və digər hücum silahlarının yerləşdirilməsindən asılı olacaq.
Qeyd edək ki, aprelin 4-də Finlandiyanın NATO-ya üzv olmasına dair rəsmi prosedurlar başa çatıb.
Finlandiyanın NATO-ya üzvlüyü məsələsini Rusiya Prezidentinin mətbuat katibi Dmitri Peskov da şərh edib. O bildirib ki, Kreml Finlandiyanın NATO-ya üzv olmasını vəziyyətin gərginləşdirilməsi, Rusiyanın milli maraqlarına təhdid kimi qiymətləndirir.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
