Rusiya parlamentinin Federasiya Şurasının nümayəndə heyəti Azərbaycanda prezident seçkilərini müşahidə edəcək
Moskva, 2 fevral, AZƏRTAC
Rusiya Federasiyası Federal Məclisinin Federasiya Şurasının nümayəndə heyəti başda beynəlxalq məsələlər üzrə komitənin sədri Qriqori Karasin olmaqla, Azərbaycanda prezident seçkilərinin müşahidəsində iştirak edəcək.
AZƏRTAC xəbər verir ki, bu barədə parlamentin yuxarı palatasının mətbuat xidməti bildirib.
“Fevralın 5-dən 8-dək senatorlar Azərbaycan Respublikasında növbədənkənar prezident seçkilərinin müşahidəsində iştirak edəcəklər”, - deyə məlumatda vurğulanır. Qeyd olunur ki, parlamentarilər Azərbaycana MDB, Şanxay Əməkdaşlıq Təşkilatı və MDB-nin Parlamentlərarası Assambleyasının müşahidəçilər missiyasının xətti ilə yollanacaqlar.
Nümayəndə heyətinin tərkibinə Federasiya Şurasının elm, təhsil və mədəniyyət komitəsi sədrinin birinci müavini İlyas Umaxanov, Federasiya Şurasının federativ quruculuq, regional siyasət, yerli özünüidarəetmə və Şimal məsələləri komitəsi sədrinin müavini Anatoli Şirokov və Federasiya Şurasının Konstitusiya qanunvericiliyi və dövlət quruculuğu komitəsinin üzvü Aleksandr Başkin daxildir.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
