Şahdağ MDB ölkələrində trekinq üçün ən populyar kurortların ilk üçlüyünə daxildir
Bakı, 22 iyun, AZƏRTAC
TurStat turizm saytı Rusiyada və digər MDB ölkələrində yay trekinqi bazarında tədqiqat aparıb və piyada dağ yürüşləri üçün turistlər arasında ən populyar olan kurortları seçib.
AZƏRTAC TurStat saytına istinadla bildirir ki, trekinq-kurortların reytinqi həmin kurortların infrastrukturu və nəqliyyat üçün əlçatanlığı nəzərə alınmaqla yay mövsümündə yaşamaq üçün mehmanxanaların bronlanması barədə məlumatlar əsasında tərtib edilib.
Rusiyada və digər MDB ölkələrində ən populyar trekinq-kurortların və trekinq yerlərinin ilk onluğuna Krasnaya Polyana (Soçi), Çimbulak (Qazaxıstan), Şahdağ (Azərbaycan), Dombay (Qaraçay-Çərkəz Respublikası) və digər kurortlar daxildir.
TurStat saytının məlumatına görə, Azərbaycandakı Şahdağ kurortu təyyarə ilə gedib gəlməyin dəyərinə (təxminən 10 min rubl) və yaşamaq haqqına (sutkada 5 min rubla qədər) görə Krasnaya Polyana (Soçi) kurortları ilə rəqabət aparır, lakin beynəlxalq aeroportdan, Bakıdan və Xəzər dənizindən xeyli uzaqda (230 kilometr) yerləşir.
Dağ istirahəti həvəskarlarına Şahdağda yay vaxtı trekinqdən əlavə, dağ velosiped turları, siqvey-turlar, trottinet, kvadrosikl, bob-kart, ziplayn və at belində gəzintilər təklif olunur.
TurStat saytının məlumatına görə, Qazaxıstanın Almatı şəhərindən 25 km məsafədə yerləşən Çimbulak dağ kurortunda iki nəfərin bir sutka yaşaması yemək haqqı ilə birlikdə 5 min rubla qədər xərc tələb edir. Lakin Moskvadan Almatıya təyyarə ilə gedib-gəlmək Soçi ilə müqayisədə iki dəfə bahadır (20 min rubl). Çimbulakda trekinqdən əlavə, 2260 metr yüksəklikdə kanat yolu ilə 3163 metr yüksəklikdə Talqar aşırımına qədər getmək, Zailiysk Alatau zirvələrinə qalxmaq, qayayadırmaşma idmanı ilə məşğul olmaq, buzlaqlara baqqi-turlar etmək, kəndir parkına getmək, paraplanda (təlimatçı ilə birlikdə) uçmaq mümkündür.
Soçinin dağ kurortlarına yayda bir milyondan çox turist gedir. Bu kurortlar rusiyalıların yay trekinqi üçün ən populyar olmaqla bərabər, həm də istirahətin dəyəri baxımından çox münasibdir. Soçiyə təyyarə və ya qatarla gedib-gəlmək adambaşına 10 min rubla qədər, dağ kurortlarında iki nəfərin bir gün yaşaması və qidalanması 5 min rubl xərc tələb edir. Soçinin dağ kurortları Adler Beynəlxalq Aeroportundan və Qara dənizdən 40 kilometr məsafədə yerləşir.
Krasnaya Polyanada (Soçi) dağlarda yay istirahəti həvəskarları arasında “Roza Xutor” və “Qorki qorod” kurortları daha populyardır. Yay vaxtı bu kurortlarda turistlər üçün trekinqdən əlavə, kanat yolu ilə Soçinin ən yüksək (2320 metr) müşahidə meydançasına qalxmaq, skandinav yerişi, dağ cığırlarında qaçış, at belində gəzinti, kvadro-turlar, yoqa, raftinq, kəndir parkı, skaypark, velosipedlərin kirayəsi, bayk-pass, habelə İmereti buxtasındakı çimərlikdə istirahət imkanları təklif edilir.
Bölmənin digər xəbərləri
