Şalva Papuaşvili avropalı siyasətçiləri Tbilisidə faşizmin təbliğində ittiham edib
Tbilisi, 15 noyabr, AZƏRTAC
Gürcüstan parlamentinin sədri Şalva Papuaşvili Tbilisiyə səfər edən avropalı siyasətçilərin məsuliyyətsiz bəyanatlarını faşizmin təbliği kimi qiymətləndirib.
AZƏRTAC xəbər verir ki, bu barədə Ş.Papuaşvili özünün sosial şəbəkə səhifəsində yazıb.
Papuaşvili müxalif “Formula” telekanalından yayımlanan videoları da paylaşıb. Videolarda bəzi fəallar əllərində qara rəngli nöqtələrlə işarələnmiş ağ plakatlar tutublar. Bundan sonra isə bu cür rəngli plakatlar paytaxt Tbilisidəki bəzi tarixi abidələrin üzərində görünməyə başlayıb. Bəzi məlumatlara görə, bu cür plakatlar Avropanın 8 ölkəsindən deputatların Tbilisiyə səfərindən sonra görünməyə başlayıb.
Papuaşvili deyib: “Avropalı siyasətçilər bizim ailələrimizin içərisinə soxulurlar və bunu siyasi aktivlik kimi qələmə verməyə çalışırlar. Bu, heç də fəallıq deyil, sadəcə faşizmdir. Bu cür qara ləkəli faşist sarğıları gürcü xalqının yaddaşında faşizmin təbliğatı kimi qalacaq”.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
