Şamaxı rayonunda silsilə oğurluqlar edən şəxs saxlanılıb
Bakı, 4 mart, AZƏRTAC
Şamaxı Rayon Polis Şöbəsinə Çarhan kəndindəki evlərin birindən ümumi dəyəri 3200 manat olan inşaat materialları, müxtəlif məişət əşyaları və təmir-tikinti alətlərinin oğurlanması barədə müraciət daxil olub.
Daxili İşlər Nazirliyinin mətbuat xidmətinin Şəki regional qrupundan AZƏRTAC-a bildiriblər ki, cinayət əməlini törətməkdə şübhəli bilinən şəxs - zərərçəkmişin həmkəndlisi Ruslan Mahmudov həmin müraciət əsasında keçirilmiş əməliyyat-axtarış və istintaq tədbirləri nəticəsində saxlanılıb.
Araşdırma zamanı onun yanvar-fevral aylarında Çarhan kəndi ərazisində daha 6 evdən oğurluq etdiyi məlum olub. Belə ki, R.Mahmudovun ev sahiblərinin evdə olmamasından istifadə edərək həmin ünvanlara daxil olduğu, ümumi dəyəri 5 min manata yaxın olan müxtəlif məişət əşyaları və elektrik kabelini oğurladığı müəyyən edilib. O, oğurladığı əşyaların bir qismini satıb, digərləri isə polis əməkdaşları tərəfindən maddi sübut kimi götürülüb.
Faktla bağlı Şamaxı Rayon Polis Şöbəsində cinayət işi başlanıb, istintaq-əməliyyat tədbirləri davam etdirilir.
Bölmənin digər xəbərləri
