Şamaxıda Xocalıda soyqırımı qurbanlarının xatirəsi anılıb
Şamaxı, 24 fevral, AZƏRTAC
Şamaxıda rayon icra hakimiyyətinin təşkilatçılığı ilə Xocalı soyqırımının 30-cu ildönümü ilə əlaqədar tədbir keçirilib. Mədəniyyət evində təşkil edilən tədbirdə rayon icra hakimiyyətinin başçısı Tahir Məmmədov, Milli Məclisin deputatı Tamam Cəfərova, idarə, müəssisə və təşkilatların rəhbərləri, ictimaiyyət nümayəndələri, Vətən müharibəsinin iştirakçıları iştirak ediblər.
AZƏRTAC-ın bölgə müxbiri xəbər verir ki, əvvəlcə Dövlət Himni səsləndirilib, soyqırımı qurbanlarının, Azərbaycanın azadlığı və torpaqlarımızın bütövlüyü uğrunda şəhid olanların xatirəsi bir dəqiqəlik sükutla yad edilib.
Tədbirdə çıxış edən icra hakimiyyətinin başçısı Tahir Məmmədov 1992-ci il fevralın 25-dən 26-na keçən gecə Xocalıda törədilən soyqırımının insanlığa qarşı ən dəhşətli cinayət olduğunu vurğulayıb, Xocalı həqiqətlərinin dünyaya çatdırılması, qətliama obyektiv qiymət verilməsi istiqamətində ümummilli lider Heydər Əliyevin, Prezident İlham Əliyevin, Heydər Əliyev Fondunun gördüyü işləri xüsusi vurğulayıb. O, Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq kampaniyası çərçivəsində dünya ictimaiyyətinin məlumatlandırılması məqsədilə həyata keçirilən tədbirlərdən də bəhs edib.
Tahir Məmmədov 2020-ci il sentyabrın 27-də başlanan və Prezident, Ali Baş Komandan İlham Əliyevin rəhbərliyi ilə 44 gündə Qələbə ilə başa çatan Vətən müharibəsinin tarixi əhəmiyyətindən danışıb, şəhidlərimizin qanının yerdə qalmadığını vurğulayıb.
Milli Məclisin deputatı Tamam Cəfərova çıxışında tarixi torpaqlarımızda məskunlaşan ermənilərin ölkəmizə qarşı daim ərazi iddiasında olmaları, məkrli və təcavüzkar siyasət yürütmələri, torpaqlarımızı işğal etmələri, əlverişli strateji və coğrafi mövqedə olan Xocalıda və digər yaşayış məntəqələrimizdə xüsusi amansızlıqla xeyli sayda dinc sakini qətlə yetirmələri və əsirlərə qarşı qeyri-insani hərəkətləri barədə danışıb.
YAP Şamaxı rayon təşkilatının sədri Tural Qasımlı, Qafqaz Müsəlmanları İdarəsinin Şamaxı və Qobustan üzrə səlahiyyətli nümayəndəsi Mərəhmət Mustafayev, Xocalı Polis İdarəsinin sabiq rəis müavini Hafiz Ədilov, rayon Ağsaqqallar Şurasının sədri Mayıl Alcanov, Veteranlar Təşkilatının sədri Ağarza Bayramov, II Qarabağ müharibəsinin veteranları Elvin Məmmədli, Rizvan Cəbrayılov Xocalı faciəsinin baş vermə səbəblərindən və acı nəticələrindən söhbət açaraq, 44 günlük Vətən müharibəsində bütün şəhidlərimiz kimi, Xocalı soyqırımı qurbanlarının da qisasının alındığını bildiriblər.
Tədbir çərçivəsində Prezident İlham Əliyevin müvafiq sərəncamlarına əsasən bir qrup Vətən müharibəsi iştirakçısına təltif olunduqları medallar təqdim edilib.
Bölmənin digər xəbərləri
