Şanlı zəfər tariximiz - Aprel döyüşlərinin qəhrəmanları danışır VİDEO
Cəbrayıl, 3 aprel, Tahir Ağaməmmədov, AZƏRTAC
Azərbaycan Ordusunun parlaq tarixi qələbələrindən olan şanlı Aprel döyüşlərindən dörd il ötür. 2016-cı il aprelin 2-də Ermənistan silahlı qüvvələrinin təxribatlarına cavab olaraq, Azərbaycan Ordusu sürətli əks-hücum əməliyyatı ilə düşməni ağır məğlubiyyətə uğratdı, Füzuli, Cəbrayıl və Ağdərə rayonlarının işğal altındakı ərazilərinin 2000 hektardan çox hissəsini azad etdi. Həmçinin minlərlə hektar ərazi Azərbaycan Ordusunun tam nəzarətinə keçdi. Azərbaycan Ordusu dördgünlük Aprel döyüşləri ilə 23 ildən sonra xalqımıza qələbə sevinci yaşatdı.
AZƏRTAC-ın bölgə müxbiri Aprel döyüşləri zamanı işğaldan azad edilmiş Lələtəpə yüksəkliyində hərbçilərlə söhbət edib, döyüş təəssüratlarını öyrənib.
Azərbaycanın Milli Qəhrəmanı, polkovnik Şükür Həmidov xalqımızı Aprel döyüşlərinin dördüncü ildönümü münasibətilə təbrik edərək deyib: “2016-cı il aprel ayının 1-dən 2-nə keçən gecə düşmənin hücumunun qarşısı ön mövqelərdə duran bölmələrimiz tərəfindən alındı, düşmən itki verərək hücumu dayandırmağa məcbur oldu. Üst komandanlığın əmri ilə bölmələrimiz əks hücuma keçdi və düşməni məhv edərək, işğal altında olan ərazilərimizin bir hissəsini azad etdi. Lələtəpə yüksəkliyi işğal altında olan zaman yaşayış məntəqələrimiz düşmənin atəşi altında idi. İndi isə əhali yaşayış məntəqələrində rahat həyat tərzi sürür, təhlükəsiz əkin-biçin işləri ilə məşğuldur. Aprel döyüşləri Ali Baş Komandanın dediyi kimi ordumuzun gücünü, xalqla birliyini, Azərbaycan xalqının həmrəyliyini nümayiş etdirdi. Azərbaycanın zəfər tarixi oldu. Lələtəpə və Talış yüksəkliklərinin azad edilməsi Azərbaycan Ordusunun yüksək döyüş qabiliyyətində və ruhunda olmasını sübut etdi. Həmin döyüşləri xatırlayıram. Əsgərlərimiz, zabit və gizirlərimiz yüksək həvəslə, Vətən sevgisi ilə düşmən üzərinə hücum edirdilər. Onlar torpaqlarımızı azad etmək üçün canlarından keçirdilər. Allah bütün şəhidlərimizə rəhmət eləsin”.
Şükür Həmidov bildirib ki, Aprel döyüşləri Azərbaycan Ordusunun son döyüşü deyil. Ordumuz Ali Baş Komandanın əmri ilə gələcək döyüşlərdə uğurlarını davam etdirəcək, yeni-yeni zəfərlər qazanacaq.
“Biz - Azərbaycan Ordusunun zabit və əsgərləri arzu edirik ki, tezliklə Ali Baş Komandanın hücum əmrini alaq, işğal altında olan bütün ərazilərimizi düşməndən azad edək. Lələtəpə yüksəkliyində dalğalanan üçrəngli bayrağımız hazırda işğal altında olan bütün şəhər və kəndlərimizdə dalğalansın. Hamımızın illərdir gözlədiyimiz zəfər bayramını qeyd edək”, - deyə Ş.Həmidov vurğulayıb.
2016-cı ilin aprelində Lələtəpə istiqamətində gedən döyüşlərin iştirakçısı, “Azərbaycan Bayrağı” ordenli gizir Tahir Misirxanov həmin günləri belə xatırlayır: “Dörd il öncə, aprelin 1-dən 2-nə keçən gecə düşmən bölmələri Cocuq Mərcanlı-Horadiz yaşayış məntəqəsi istiqamətində kəndləri və əhalini atəşə tutmağa başladılar. Komandanlıq tərəfindən həyəcan siqnalı ilə qaldırılaraq öz mövqelərimizdə yerləşdirildik. Əks hücuma keçən bölmələrimiz tərəfindən yüksək strateji mövqe olan Lələtəpə yüksəkliyi səhər saatlarında düşməndən azad edildi və Azərbaycanın üçrəngli bayrağı orada dalğalanmağa başladı. Həmin gün saat 9-10 radələrində düşmən zirehli texnikalarla Lələtəpə istiqamətində hücuma keçməyə cəhd etdi. Mənə verilən tapşırıqla düşmənin 3 kalonunu sıradan çıxardım. Hər zaman Ali Baş Komandanın əmrinə hazıram. Xalqımızı əmin edirəm ki, növbəti döyüşlərdə bayrağımızı azad edilmiş digər torpaqlarımızda da dalğalandıracağıq”.
Polkovnik-leytenant Faiq Qasımov da Aprel döyüşlərində iştirak etdiyinə, Vətənin keşiyində durduğuna görə fəxr etdiyini bildirib: “2016-cı ildə düşmən cəbhədə təxribatlar edirdi. Aprelin 1-dən 2-nə keçən gecə düşmənin təxribatının qarşısını aldıq və Lələtəpə yüksəkliyini azad edərək, oradakı düşməni məhv etdik. Mən bir şəhid qardaşıyam və dörd il əvvəl olduğu kimi yenə də səngərdə xidmətimi davam etdirirəm. Bununla qürur duyuram. Bir zabit kimi deyə bilərəm ki, Azərbaycan Ordusunun hazırlığı və döyüş ruhu yüksəkdir. Silahlı Qüvvələrimiz Ali Baş Komandanın əmrinə hər an hazırdır. Əminəm ki, biz işğal altında olan bütün torpaqlarımızı azad edəcək, şəhidlərimizin qisasını alacağıq”.
Gizir İmran Remixanov da Azərbaycan Ordusunun daha böyük zəfərlərinə inamını ifadə edib: “Aprel döyüşləri kimi döyüşlərimiz gələcəkdə çox olacaq. Düşmən işğalında olan digər torpaqlarımızı da azad edəcəyik. Biz bu qələbəmizlə bir daha sübut etdik ki, Azərbaycan Ordusu nəyə qadirdir. Düşmən yaralıları qoyub qaçırdı. Düşmən Azərbaycan Ordusunun gücünü bir daha gördü. Düşmənlərimiz bilsinlər ki, onları işğal etdikləri torpaqlarda ölüm tapacaq. Biz düşmənə qat-qat ağır zərbələr endirəcəyik”.
Aprel döyüşlərinin iştirakçısı Rövşən Rəhimov dörd il əvvəl olduğu kimi, bu gün də Vətənimizin müdafiəsində ayıq-sayıq dayanıb. Deyir ki, bütün Azərbaycan hərbçiləri kimi onun da istəyi Aprel döyüşlərində qazanılan zəfərləri davam etdirməkdir: “Azərbaycan Ordusundakı döyüş əhval-ruhiyyəsi onu göstərir ki, biz işğal altındakı bütün torpaqlarımızı azad etməyə hazırıq. Ordumuz günü-gündən daha da qüdrətlənir. Biz buradan düşmənin qorxduğunu hiss edirik. Səhər tezdən sevinərək postu təhvil vermələri düşmənin zəifliyini göstərir. Düşmən bilsin ki, bizim torpaqlarda əbədi qalmayacaq. Biz onlara daha ağır zərbələr endirəcək və işğal altında olan bütün ərazilərimizi azad edəcəyik”.
Lələtəpə yüksəkliyində döyüş mövqeyində dayanan hərbi qulluqçularla söhbət zamanı bir daha əmin olduq ki, Azərbaycan Ordusunun döyüş əzmi və Vətən sevgisi sayəsində dörd il əvvəl işğaldan azad edilmiş ərazilərdə yüksələn üçrəngli bayrağımız bu gün düşmən tapdağında olan digər torpaqlarımızda da dalğalanacaq.
Bölmənin digər xəbərləri
