Səadət Yusifova: İçərişəhər haqlı olaraq Azərbaycanın tarixi və mədəni irsinin incisi hesab olunur
Bakı, 18 dekabr, Günel Alıyeva, Tofiq Babayev, AZƏRTAC
Bu gün biz qədim şəhərimiz olan İçərişəhərin UNESCO-nun əsas Ümumdünya İrs Siyahısına daxil edilməsinin 25-ci ildönümünü qeyd edirik. Bu yubiley İçərişəhərin haqlı olaraq Azərbaycanın tarixi və mədəni irsinin incisi hesab edildiyini və Siyahıya daxil edilən ölkəmizin ilk obyektlərindən biri olduğunu bir daha təsdiq etmək üçün vacib bir fürsətdir.
Bunu mədəniyyət nazirinin müavini Səadət Yusifova AZƏRTAC-ın müxbirinə verdiyi müsahibədə bildirib.
“Yeni nominasiyaların hazırlanması aparılır, paralel olaraq əvvəlki illərdə Siyahıya daxil edilmiş obyektlərin inkişafına və təşviqinə diqqət yetirilir. Məlum olduğu kimi, UNESCO irsi maddi və qeyri-maddi olaraq bölünür: Azərbaycan birinci kateqoriyada dörd nominasiya, ikinci kateqoriyada isə 24 element təqdim edib. Bunların hər biri üzrə Mədəniyyət Nazirliyi mütəmadi olaraq milli irsin qorunmasına və təşviqinə yönəlmiş tədbirlər keçirir”, - deyə nazir müavini qeyd edib.
Səadət Yusifova deyib ki, Azərbaycanın tarixi abidələri Ümumdünya İrs Siyahısına daxil edildikdən sonra beynəlxalq auditoriya tərəfindən onlara maraq xeyli artmışdır. “Hər hansı bir qonaq və ya turist ölkəyə gələrək ilk növbədə beynəlxalq səviyyədə tanınmış bu mədəni marşrutlara müraciət edir. Bu, təkcə ölkənin imicinə deyil, həm də iqtisadiyyata təsir göstərir, ölkəyə və turizmin inkişafına marağı artırır”, - deyə o vurğulayıb.
Onun sözlərinə görə, bu istiqamətdə iş ardıcıl olaraq davam etdiriləcək: “Azərbaycanın mədəni irsinin qorunması, inkişafı və dünyaya layiqincə təqdim edilməsi prioritet olaraq qalır”.
Bölmənin digər xəbərləri
