Bakı, 1 sentyabr, AZƏRTAC

Gənc nəslin vətənpərvər, dövlətçilik ruhunda tərbiyəsi, onların sağlam və bilikli böyüməsi istiqamətində Səbail Rayon İcra Hakimiyyəti və Müdafiə Nazirliyi tərəfindən ikinci dəfə həyata keçirilən layihə başa çatıb. Səbail rayonunun orta məktəblərinin təhsildə, idmanda və ictimai həyatda fərqlənən şagirdləri, həmçinin ön xətdə xidmət edən zabitlərin övladları - ümumilikdə 180 məktəbli Müdafiə Nazirliyinin Qusar rayonundakı “N” saylı hərbi hissəsində yaradılmış “Gənc Heydərçilər” hərbi-vətənpərvərlik təmayüllü yay düşərgəsində mənalı və məzmunlu istirahət edib.

Səbail Rayon İcra Hakimiyyətindən AZƏRTAC-a bildiriblər ki, layihənin Müdafiə Nazirliyinin hərbi hissəsində keçirilməsi məktəblilərə hərbi sahədə daha çox biliklər və təcrübə əldə etməyə imkan verib.

Düşərgədə Vətənimizin, xalqımızın tarixindən bəhs edən məşğələlər, görüşlər, idman yarışları keçirilib, müxtəlif filmlər nümayiş etdirilib. Yeniyetmələrə silahların sökülüb yığılması öyrədilib. Onlar, həmçinin təlim prosesində maneələri dəf edərək avtomat silahdan atəş açıb, hərbi texnikanın döyüş təlimini izləyiblər.

Hərbçilərlə bilavasitə təmasda olmaq, əsgərlərin gündəlik həyatı ilə yaxından tanışlıq yeniyetmələrin gələcək hərbi xidmətə daha yaxşı hazırlaşmasına, onlarda hərbçi peşəsinə olan marağın artırılmasına şərait yaradıb.

Uşaqların Qusar, Quba və Xaçmaz rayonlarının görməli yerlərinə, meşələrinə, tarixi guşələrinə, o cümlədən Qubadakı Soyqırımı Muzey-Kompleksinə, Qusar və Xaçmazdakı Heydər Əliyev mərkəzlərinə, Gənclər Evinə, Xalça və Şəxsiyyətlər muzeylərinə, Şahdağ Qış-Yay Turizm Kompleksinə gəzintiləri də təşkil olunub.

Düşərgənin bağlanışı ilə əlaqədar təşkil olunmuş tədbirdə iştirak edən layihə təşkilatçıları və çoxsaylı qonaqlar əvvəlcə hərbi hissədə xalqımızın ümummilli lideri Heydər Əliyevin büstünü ziyarət edərək önünə tər çiçəklər düzüblər.

Tədbirdə çıxış edən Səbail Rayon İcra Hakimiyyətinin başçısı Asif Əsgərov layihənin əhəmiyyətini vurğulayıb. Prezident İlham Əliyevin gənc nəslin sağlam böyüməsi, vətənə məhəbbət, Azərbaycan dövlətçiliyinə sədaqət ruhunda tərbiyə olunması istiqamətində gördüyü işlərdən, Azərbaycanın birinci xanımı, Heydər Əliyev Fondunun prezidenti Mehriban Əliyevanın uşaq və yeniyetmələrə diqqət və qayğısından, bu istiqamətdə həyata keçirdiyi layihələrdən danışılıb. Həmçinin Səbail rayonunda görülən işlər və həyata keçirilən layihələr barədə məlumat verilib.

Müdafiə Nazirliyinin idarə rəisi, general-mayor Rasim Əliyev, Qusar Rayon İcra Hakimiyyətinin başçısı Şair Alxasov və digər çıxış edənlər gənc nəslin vətənə sevgi və məhəbbət ruhunda tərbiyəsində belə düşərgələrin rolunu yüksək qiymətləndiriblər.

Hərbi təlimlərdə fərqlənən, idman yarışlarında qalib gələn şagirdlərə xatirə medalları, dəstə rəhbərlərinə və hərbçilərə isə qiymətli hədiyyələr təqdim edilib.