SEÇİCİLƏRİNİN SAYI 5 MİN NƏFƏRDƏN ÇOX OLAN MƏNTƏQƏLƏRDƏ KOMİSSİYA ÜZVLƏRİ ƏMƏK HAQQI ALACAQLAR
Milli Məclisin aprelin 5-də keçirilən iclasında “Seçki Məcəlləsi” layihəsinin müzakirəsi davam etdirilmişdir. Müzakirələr əsasən 3-cü və 4-cü bölmələri ətrafında aparılmış, 3-cü bölmə nəzəri cəhətdən qəbul edilmişdir.
Deputat Şahlar Əsgərov layihədə Şərq adət-ənənələrinin nəzərə alınmasını və seçkilərdə səsvermə zamanı ailə başçısının, yəni ərin öz arvadının yerinə səs verməsnə qanunla icazə verilməsini və bunun layihədə öz əksini tapmasını təklif etmişdir.
Seçki komissiyaları üzvlərinin əmək haqqı almaları məsələsi də maraq doğurub.
Prezidentin İcra Aparatının qanunvericilik və hüquq ekspertizası məsələləri şöbəsinin müdiri Şahin Əliyev demişdir ki, adət-ənənələrə hörmət etməliyik, ancaq demokratik dövlətdə demokratik qanunlar işləməli, qanunlar heç kimin hüquqlarını məhdudlaşdırmamalıdır. Seçki komissiyalarının üzvlərinin əmək haqqı məsələsinə də acıqlama verildi. Qeyd edildi ki, seçicilərinin sayı beş min nəfərdən çox olan seçki məntəqələrində komissiya üzvləri əmək haqqı almaqla daimi fəaliyyət göstərəcəklər. Seçicilərinin sayı 5 mindən az olan məntəqələr isə yalnız seçki vaxtı fəaliyyət göstərəcəklər.
Müxalifətin müzakirələr zamanı səslənmiş digər təkliflərə də münasibət bildirilməsi təklifinə cavab verən sədr Murtuz Ələsgərov dedi ki, bütün təkliflər öyrənilir. Məcəllə 3-cü oxunuşa çıxarılarkən nəzərə alınan təkliflər barədə məlumat veriləcəkdir.
Müzakirələr aprelin 7-də davam etdiriləcək.
Bölmənin digər xəbərləri
