SEÇİCİLƏRLƏ GÖRÜŞLƏR KEÇİRİLMİŞDİR
Aprelin 3-də Milli Məclis sədrinin müavini Gövhər Baxşəliyeva 57 saylı Bərdə - Ağcabədi seçki dairəsindən olan seçiciləri ilə görüşmüşdür.
Milli Məclisin mətbuat xidmətindən AZƏRTAC-a bildirmişlər ki, Bərdə rayonunun Mustafaağalı, Alpout və Qarayusifli kəndlərinin əhalisi ilə keçirilən görüşlərdə Milli Məclis sədrinin müavini ölkəmizdə ictimai-siyasi vəziyyət, Prezident Heydər Əliyevin xarici və daxili siyasəti, respublikada aparılan islahatlar, parlamentdə görülən işlər barədə seçicilərinə ətraflı məlumat vermiş, onları narahat edən sualları cavablandırmış, əhalinin qayğıları ilə maraqlanmışdır. Bildirilmişdir ki, respublikamızın Prezidentinin təhsil müəssisələrinin maddi-texniki bazasının yaxşılaşdırılması haqqında fərmanına uyğun olaraq kənd məktəblərinin təmirinə və lazımi avadanlıqla təmin edilməsinə ciddi diqqət yetiriləcəkdir. Su problemini həll etmək üçün bir sıra kəndlərdə yeni artezian quyuları qazılacaq, elektrik enerjisinin verilməsi ilə bağlı kənd əhalisinin arzusu nəzərə alınacaqdır.
Görüşlərdə iştirak edən rayon icra hakimiyyətinin nümayəndəsi əhali tərəfindən qaldırılan məsələlərin tezliklə həll olunması üçün lazımi tədbirlərin görüləcəyini bildirmişdir.
Tədbirlərin iştirakçıları qarşıdakı Prezident seçkilərində görkəmli dövlət xadimi, xalqımızın ümummilli lideri Heydər Əliyevin namizədliyini yekdilliklə dəstəkləyəcəklərini bəyan etmişlər.
Bərdəyə səfər zamanı parlament sədrinin müavini Gövhər Baxşəliyeva rayonda son zamanlar görülmüş abadlıq işləri ilə yaxından tanış olmuşdur.
Bölmənin digər xəbərləri
