Bakı, 5 dekabr, AZƏRTAC

Azərbaycan COP29-a ev sahibliyi etdi və bu dövr ərzində Bakı şəhərində yenidənqurma işləri həyata keçirildi. Şəhərdə velosiped yollarının istifadəsi diqqət çəkir və bu sahədə yeni layihələrin həyata keçirilməsi planlaşdırılır. Velosiped yollarının istifadəsinin təşviqinə dair xüsusi layihə hazırlanması nəzərdə tutulur. Bununla yanaşı, digər önəmli təşəbbüslərimiz də mövcuddur.

AZƏRTAC xəbər verir ki, bu sözləri Azərbaycan Könüllü Təşkilatları İttifaqının sədri Vüqar Əliyev Azərbaycan Könüllülərinin VII Həmrəylik Forumu çərçivəsində keçirilən bugünkü mətbuat konfransında söyləyib.

Onun sözlərinə görə, son bir il ərzində “Bir ilmə - bir könüllü” adlı layihəyə start verilib: “Bu layihədən başqa gənclərin yaradıcılıq işlərində, qanvermə aksiyalarında və digər sosial məsuliyyət tədbirlərində iştirakı nəzərdə tutulur. Həmçinin Vətən müharibəsi zamanı könüllülərin göstərdiyi müstəsna xidmətlər xüsusi vurğulanmalıdır”.

“Növbəti mərhələdə, könüllülərin iştirakı ilə düşərgələrin təşkil edilməsi planlaşdırılır. Bu düşərgələrdən biri xüsusi əhəmiyyətə malik olacaq, çünki 12-yə yaxın xarici ölkədən könüllülər iştirak edəcək və təcrübə mübadiləsi aparılacaq. Bu, Azərbaycanın könüllülük fəaliyyətində beynəlxalq əməkdaşlıq baxımından ilk mühüm düşərgələrdən biri olacaq və həm yerli, həm də xarici könüllülər arasında qarşılıqlı öyrənmə imkanlarını təmin edəcək. Bu düşərgə Azərbaycanın könüllülük hərəkatının beynəlxalq səviyyədə tanıdılmasına və gənclər arasında əməkdaşlıq platformasının yaradılmasına mühüm töhfə verəcək. Belə təşəbbüslər ölkəmizin sosial innovasiya sahəsində liderliyini daha da möhkəmləndirir”, - deyə V.Əliyev əlavə edib.