Sədr: Türk Dövlətlərinin Dağ Kurortları İttifaqı qarşılıqlı turist axınını artıracaq
İstanbul, 23 sentyabr, Günel Karatepe, AZƏRTAC
Türk Dövlətlərinin Dağ Kurortları İttifaqının yaradılması ölkələrimiz arasında qarşılıqlı turist axınının artırılması ilə yanaşı xizək sənayesinə də böyük töhfə verəcək.
Bunu AZƏRTAC-a açıqlaması zamanı “Şahdağ Turizm Mərkəzi”nin İdarə Heyətinin sədri Rüstəm Nəcəfov bildirib.
O deyib ki, türkdilli dövlətlər arasında bu gün İstanbulda imzalanan yeni layihə ittifaqa daxil olan bütün dövlətlərdə qış turizminin təbliğini əhəmiyyətli dərəcədə artıracaq.
“Bu da sözsüz ki, ölkəyə gələn turistlərin digər ölkələrdəki bu kimi mərkəzlər haqqında geniş məlumat almasına imkan yaradacaq. Burada nəzərdə tutulan birgə paketlər də böyük rol oynayacaq. Bu paketlər sayəsində qarşılıqlı səfərlərin artması gözlənilir”, - deyə R.Nəcəfov vurğulayıb.
Qeyd edilib ki, ittifaqda yer alan dağ kurort mərkəzlərinin birgə təşəbbüsü ilə təcrübə mübadiləsi, peşəkarlığın artırılması kimi bir çox sahə üzrə ortaq layihələrin icrası planlaşdırılır: “Layihəyə əsasən, bir ölkədə qış idman növləri ilə bağlı müəyyən sahə üzrə daha peşəkar olan mütəxəssislər digər ölkələrdəkinə təlimlər keçəcəklər”.
Bölmənin digər xəbərləri
