Naxçıvan, 28 iyul, Rauf Kəngərli, AZƏRTAC

Naxçıvana hər gəlişimizdə burada böyük dəyişikliklərin və inkişafın şahidi oluruq. Bunları görən hər bir Azərbaycan türkü qürur duyur, sevinc hissləri keçirir. “Türk qapısı” adlandırılan Naxçıvanın başdan-başa abadlaşması üçün fədakarlıqla fəaliyyət göstərən hər bir insana bir Azərbaycan türkü kimi minnətdaram.

Bu sözləri AZƏRTAC-ın Naxçıvan bürosuna müsahibəsində İstanbul Türkiyə-Azərbaycan Dərnəyinin (İSTAD) sədri Səfər Qaraqoyunlu deyib.

Təxminən 6 il bundan əvvəl Naxçıvana gəldiyini qeyd edən Səfər Qaraqoyunlu həmin gündən xeyli dəyişikliklərin baş verdiyini, Naxçıvan şəhərinin daha da gözəlləşdiyini vurğulayıb. O bildirib ki, Naxçıvan şəhəri bu gün artıq dünya şəhəri, Avropa şəhərinə bənzəyir. Hər tərəf tərtəmiz və abaddır. Biz bu təmizliyi ancaq möhtəşəmliyi ilə seçilən dünya şəhərlərində görə bilərik. Binaların gözəlliyi, tarixi-memarlıq üslubunda inşası, aparılan yaşıllaşdırma işləri, şəhərin işıqlandırılması həqiqətən də möhtəşəmdir. Bu gözəllikləri muxtar respublikanın bütün bölgələrində, hətta ən ucqar dağ kəndlərində də görmək mümkündür. Bu baxımdan demək olar ki, bu gün Naxçıvan bütün dünyaya nümunə ola biləcək məkana çevrilib.

İSTAD sədri əslən Türkiyənin İğdır vilayətinin Qaraqoyunlu kəndindən olduğunu bildirərək qeyd edib ki, bu yaşayış məntəqəsi Azərbaycan və Türkiyə üçün əhəmiyyətli tarixi məkanlardan biridir. Çünki bu kəndin tarixi həm də Qaraqoyunlu dövlətinin tarixi ilə sıx bağlıdır. Adının Qaraqoyunlu olması da bununla əlaqələndirilir. Qədim türk yurdu olan yaşayış məntəqəsinin yüz illərdir mövcud olan köhnə qəbiristanlığında daş qoç heykəllər də vardır. Bildiyimiz kimi, Naxçıvanda da bu heykəllərə bir çox yerlərdə rast gəlmək mümkündür. Bu da onu göstərir ki, tarixboyu atalarımız bir-birləri ilə sıx əlaqədə olmuşlar. Yəni, Qaraqoyunluda yaşadılan mədəniyyət həm də Naxçıvanın tarixi mədəniyyəti, ortaq türk mədəniyyətidir. Bu gün kənddə yaşayanların 98 faizi əslən azərbaycanlıdır və onlar vaxtilə Naxçıvandan, o cümlədən Qərbi Azərbaycandan bura gəlib məskunlaşanların övladlarıdır.

“Mən həmin kənddəki ata ocağında muzey yaradılması üçün səyimi əsirgəmədim. Ata-babalarımızın istifadə etdiyi məişət əşyalarını və kənd təsərrüfatı alətlərini toplayaraq muzeyin ekspozisiyasına daxil etdim. Məqsədim buradaki mövcud adət-ənənələrimizi, mədəniyyətimizi qoruyub saxlamaq, gələcək nəsillərə çatdırmaqdır”, - deyən Səfər Qaraqoyunlu vurğulayıb ki, bu gün muzeyə çoxsaylı ziyarətçilər gəlir, bizim qədim mədəniyyətimizi əks etdirən eksponatlarla tanış olur, bundan sevinc hissləri keçirirlər. Çünki burada unudulmağa üz tutmuş məişət əşyaları və kənd təsərrüfatı alətlərini görmək hər bir insana keçmişi xatırladır, sahib olduğu mədəniyyəti sanki ona təkrar aşılayır.

Muxtar respublikada qədim mədəniyyətimizi əks etdirən çoxsaylı muzeylərin fəaliyyət göstərməsinin sevindirici hal olduğunu qeyd edən İSTAD sədri deyib ki, bu, milli-mənəvi dəyərlərimizə, tarixi keçmişimizə verilən çox yüksək qiymətdir. Tarixi abidələrin bərpa olunaraq türk dünyasına geri qaytarılması isə ancaq tarixi şəxsiyyətlərin görə biləcəyi çox böyük işlərdəndir. Bu mənada deyə bilərəm ki, muxtar respublikada bu günədək onlarla tarixi abidənin bərpa olunması keçmişimizin yaşadılmasına ən böyük töhfədir.