Şəhər Gününün işğaldan azad olunmuş bütün ərazilərdə keçirilməsi Qarabağ Azərbaycandır reallığının təntənəsidir
Bakı, 31 avqust, AZƏRTAC
Azərbaycanın işğaldan azad edilmiş əraziləri üzrə şəhər günlərinin təsis edilməsi haqqında Azərbaycan Respublikası Prezidentinin Sərəncamına əsasən bir neçə gün əvvəl Laçın rayonunda keçirilmiş bayram ovqatlı təntənəli mərasimlər bir daha dünyaya bəyan etdi ki, Qarabağ Azərbaycandır. Halbuki, bir neçə il əvvəl biz ərazilərimizin işğal olunduğu günü qəm-qüssə ilə anır, qətlə yetirilənlərin xatirəsini yad edirdik. Ancaq içimizdə bir inam yaranmışdı ki, biz işğal altında olan ərazilərimizi düşməndən azad edəcəyik. Öz doğma ata-baba yurdlarından didərgin salınmış soydaşlarımız isti ocaqlarına qayıdacaqlar. Nəhayət, səbirsizliklə gözlədiyimiz gün yetişdi. Kədərlə, qəm-qüssə ilə andığımız işğal gününü indi işğaldan azad olunmuş ərazilərdəki şəhərlərin günləri kimi təntənəli şəkildə qeyd edirik.
Bu fikirləri AZƏRTAC-a açıqlamasında Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə deyib.
O bildirib ki, işğal altında olan ərazilərimizin azad ediləcəyi və soydaşlarımızın doğma ata- baba yurdlarına qayıdacağı günün inamını Prezident İlham Əliyev 2003-cü ilin oktyabrında keçirilən andiçmə mərasimindəki nitqində qəti fikirləri ilə yaradıb: “Azərbaycanın torpaqları işğaldan azad olunmalıdır, bir milyon qaçqın və məcburi köçkün öz doğma yurdlarına qayıtmalıdır, ölkəmizin ərazi bütövlüyü bərpa edilməlidir. Azərbaycan heç vaxt bu vəziyyətlə, torpaqlarının işğal altında qalması ilə barışmayacaq. Hamı bilməlidir ki, sülh tərəfdarı olmağımıza baxmayaraq, müharibənin yenidən başlanmamasını və bu məsələnin sülh yolu ilə həllini istəməyimizə baxmayaraq, bizim səbrimiz də tükənməz deyildir. Azərbaycan öz doğma torpaqlarını nəyin bahasına olursa-olsun, azad edəcək. Mən Azərbaycanın xoşbəxt gələcəyinə inanıram”. İyirmi ilə əvvəl qarşıya qoyulmuş bu vəzifə artıq reallığa çevrilib. Bu gün keçmiş məcburi köçkünlər böyük coşqu ilə isti ocaqlarına qayıdırlar.
Hüquq müdafiəçisinin sözlərinə görə, Ermənistan üzərindəki tarixi Qələbəmizdən sonra Qarabağın nüfuzlu beynəlxalq təşkilatların öz tədbirlərini keçirdikləri məkana çevrilməsi, işğaldan azad olunmuş ərazilərdə müxtəlif sərgilərin, beynəlxalq idman yarışlarının və digər tədbirlərin təşkil olunması dünya ictimaiyyətinin diqqətini Azərbaycana - Qarabağa cəlb etdi. Keçmiş məcburi köçkünlərin öz doğma yurdlarına dönüşü üçün Prezident İlham Əliyevin 2022-ci il 16 noyabr tarixli Sərəncamı ilə təsdiq edilmiş “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nın icrasına başlanılması, Zəngilan rayonunun Ağalı kəndinə, Tərtər rayonunun Talış kəndinə və Laçın şəhərinə məcburi köçkünlərin qayıdışının təmin olunması, bu istiqamətdə işlərin davam etdirilməsi həm Ermənistana, həm də ermənipərəstlərə ciddi zərbə oldu.
“Azərbaycan Respublikasının işğaldan azad olunmuş əraziləri üzrə şəhər günlərinin təsis edilməsi haqqında Azərbaycan Respublikası Prezidentinin Sərəncamı Ermənistana və onun havadarlarına daha bir zərbədir. Bu yaxınlarda ilk Şəhər Gününün böyük təntənə ilə Laçında qeyd edilməsi, Azərbaycan musiqisinin dağlarda, qayalarda böyük əks-səda doğurması, 30 ildən sonra doğma yurdlarına qayıtmış laçınlılara hər cür şəraiti olan yeni mənzillərin açarlarının təqdim olunması Qarabağ Azərbaycandır reallığını bir daha dünyaya bəyan etdi. Qarşıdakı günlərdə Cəbrayılın, Füzulinin, Zəngilanın, Qubadlının, Şuşanın, Ağdamın və Kəlbəcərin Şəhər Günü təntənə ilə qeyd ediləcək. Qarabağda və Şərqi Zəngəzurda belə tədbirlərin keçirilməsi Azərbaycanın haqq işi uğrunda mübarizədə qalib olduğunu bir daha bəyan edir. İşğaldan azad edilmiş ərazilər hazırda yenidən qurulur, minalardan təmizlənir, sürətlə genişmiqyaslı bərpa və yenidənqurma işləri aparılır. Dədə-baba yurdlarına qayıdan soydaşlarımızın sayı gündən-günə artır”, - deyə Ç.Qənizadə vurğulayıb.
Bölmənin digər xəbərləri
