Səhiyyə naziri: Belarusda koronavirusa yoluxmanın pik həddi aprelin sonu mayın əvvəli gözlənilir
Minsk, 9 aprel, AZƏRTAC
Belarusda yeni növ koronavirusa yoluxmanın pik həddi aprelin sonu mayın əvvəli gözlənilir. AZƏRTAC BELTA-ya istinadla xəbər verir ki, bu barədə Belarusun səhiyyə naziri Vladimir Karanik bu gün Parlamentdə çıxışı zamanı məlumat verib.
Nazir bildirib ki, koronavirusla bağlı səhiyyə sahəsində yüklənmə hiss olunarsa, insanları bir-birindən təcrid etmək üçün sərt tədbirlər həyata keçiriləcək. Hazırda koronavirusa yoluxma halı ən çox paytaxt Minsk şəhərindədir.
“Bu gün bizim əsas işimiz, koronavirusa yoluxanları cəmiyyətdən təcrid etmək, testlərin sayını artırmaq, xəstəliyin yayılmasının qarşısını almaqdır”,- deyə V.Karanik əlavə edib.
Qeyd edək ki, Belarusda 1331 nəfər koronavirusa yoluxub, onlardan 16-sı həyatını itirib.
Emil Hüseynli
AZƏRTAC-ın xüsusi müxbiri
Minsk
Bölmənin digər xəbərləri
