“Şəki, mən səni sevirəm” adlı qısametrajlı film müsabiqəsi elan olunub
Bakı, 24 avqust, AZƏRTAC
Mədəniyyət Nazirliyi və Azərbaycan Respublikası Kinematoqrafçılar İttifaqının birgə təşkilatçılığı ilə qısametrajlı bədii, sənədli filmlər və fotoşəkil müsabiqəsi elan edib.
“Azərbaycanfilm” kinostudiyasından AZƏRTAC-a bildirilib ki, “Şəki, mən səni sevirəm” adlı müsabiqə görkəmli kinorejissor, Xalq artisti Rasim Ocaqovun 85 illiyinə həsr edilib.
Müsabiqə iştirakçıları üçün yaş məhdudiyyəti yoxdur. Müsabiqəyə istənilən janrda qısametrajlı bədii, sənədli filmlər və fotoşəkillər qəbul olunur. Müsabiqəyə filmlər müddəti 10 dəqiqədən çox olmamaq şərti ilə DVD diskdə təqdim olunmalıdır. Həmçinin müəllif müsabiqəyə filmlə birgə tərcümeyi-halını da təqdim etməlidir. Müsabiqəyə təqdim olunan fotoşəkillər CD diskdə təqdim olunmalıdır.
İştirak etmək istəyənlər oktyabrın 30-dək Azərbaycan Respublikası Kinematoqrafçılar İttifaqına müraciət edə bilər.
Ən yaxşı qısametrajlı bədii film, ən yaxşı qısametrajlı sənədli film, ən yaxşı foto işi nominasiyalarında birinci və ikinci yerlərin qaliblərinə pul mükafatları təqdim olunacaq.
Bölmənin digər xəbərləri
