ŞƏKİ OLİMPİYA İDMAN KOMPLEKSİNİN BİR YAŞI TAMAM OLUR
İdman kompleksi 10 hektar ərazidə yerləşir. Kompleksə müasir standartlara uyğun 750 yerlik əl oyunları və 300 yerlik güləş salonları, 25 metrlik üzgüçülük hovuzu, trenajor, stolüstü tennis və aerobika salonları, müxtəlif xidmət otaqları daxildir. Bundan əlavə, açıq hava şəraitində məşğul olmaq üçün böyük tennis kortu, voleybol və basketbol meydançaları da idmançıların ixtiyarına verilmişdir. Kompleksin ərazisində idmançıların qalması üçün 16 kottec tikilmiş və burada 56 nəfərin qalması üçün hər cür şərait yaradılmışdır. Respublika Milli Olimpiya Komitəsi tərəfindən kompleksə 30 yerlik təzə avtobus da hədiyyə olunmuşdur.
Şəki şəhər icra hakimiyyətinin təşəbbüsü ilə ötən dövr ərzində kompleksin qarşısında “Olimpiya meydanı” yaradılmışdır. İdarə və müəssisələrin, iş adamlarının köməyi ilə 6 hektar ərazidə abadlıq işləri aparılmış, fəvvarə və hovuzlar quraşdırılmış, meydanın ətrafındakı yollar genişləndirilmiş, yeni asfalt örtüyü salınmışdır.
Olimpiya İdman Kompleksinin icraçı direktoru Aydın Xəlilov AZƏRTAC-ın müxbiri ilə söhbətində bildirmişdir ki, kompleksin istifadəyə verilməsi Şəkidə idmanın kütləviliyinin daha da artmasına və gənclərin idmanın müxtəlif bölmələrinə axınının daha da sürətlənməsinə səbəb olmuşdur. Hazırda kompleksdə idmanın üzgüçülük növü üzrə fəaliyyət göstərən 3 qrupda 100 nəfər, karate, cüdo, taekvondo, uşu-sanda, futbol, voleybol qruplarının hər birində isə 30 nəfər məşğul olur. Bundan başqa, müxtəlif təşkilatların kollektivləri, şəhər sakinləri fərdi qaydada hər gün kompleksin xidmətlərindən istifadə edirlər.
İdman kompleksinin açılmasından cəmi bir il keçməsinə baxmayaraq, artıq burada idmanın müxtəlif növləri üzrə respublika birincilikləri, beynəlxalq görüşlər, seminarlar, şou-əyləncəli proqramlar, konsertlər təşkil olunmuşdur. Ötən bir il ərzində kompleksdə idmanın Şotokan karate-do, kinqboks, şahmat, voleybol növləri üzrə uşaq və yeniyetmələr arasında respublika birincilikləri və Şəkinin idman tarixində ilk dəfə olaraq, üzgüçülük üzrə açıq şəhər birinciliyi keçirilmişdir. Yeniyetmələr arasında keçirilən şahmat üzrə ölkə birinciliyi öz kütləviliyi ilə xüsusilə seçilmişdir. Bu yarışda 300 nəfərdən artıq şahmatçı iştirak etmişdir. Azərbaycanın və Rusiyanın voleybol üzrə qadın komandalarının iştirakı ilə keçirilən yoldaşlıq görüşü və Cənubi Koreya taekvondoçularının nümunəvi çıxışları kompleksin bir illik idman həyatında ən yaddaqalan hadisələrdən olmuşdur.
İdman kompleksində yaradılmış hərtərəfli şərait burada respublika və beynəlxalq səviyyəli idmançıların, yığma komandaların təlim-məşq toplantılarının keçirilməsinə də imkan verir. Ötən dövr ərzində kompleksdə sərbəst güləş, taekvondo və ağır atletika üzrə respublika yığma komandalarının, habelə Ukrayna və Norveçin taekvondo üzrə yığma komandalarının iştirakı ilə təlim-məşq toplantıları keçirilmişdir. Digər yığma komandalardan da sifarişlər daxil olmağa başlamışdır.
Hazırda Olimpiya İdman Kompleksində 24 nəfər işçi çalışır.
Bu möhtəşəm kompleks, şübhəsiz ki, gələcəkdə bölgədə idmanla yanaşı, turizmin və digər sahələrin də inkişafına öz müsbət təsirini göstərəcəkdir.
Bölmənin digər xəbərləri
