Şəki Regional Ədliyyə Şöbəsində Xocalı faciəsinin 20 illiyi ilə bağlı anma mərasimi keçirilmişdir
Şəki, 25 fevral (AZƏRTAC). Şəki Regional Ədliyyə Şöbəsində Xocalı faciəsinin 20-ci ildönümünə həsr olunmuş tədbir keçirilmişdir. Tədbirdə Balakən, Zaqatala, Qax, Şəki, Oğuz və Qəbələ rayonlarının yerli ədliyyə qurumlarının rəhbərləri, regional şöbənin əməkdaşları iştirak etmişlər.
AZƏRTAC xəbər verir ki, tədbirin əvvəlində şəhidlərin xatirəsi bir dəqiqəlik sükutla yad edilmişdir.
Tədbiri regional şöbənin rəisi Rəhman Məmmədov açaraq Xocalı faciəsinin erməni faşizminin xislətini, gerçək mahiyyətini bütün çılpaqlığı ilə göstərən, planlaşdırılmış şəkildə həyata keçirilən, Xatın, Liditsa, Oradur soyqırımları kimi insanlıq tarixinə düşmüş qanlı olaylardan biri olaraq Azərbaycan xalqının XX əsrdə üzləşdiyi ən müdhiş qanlı faciə olduğunu bildirmişdir. Natiq həmin faciəyə yalnız ümummilli liderimiz Heydər Əliyev tərəfindən soyqırımı kimi hüquqi-siyasi qiymət verildiyini, onun təşəbbüsü ilə Milli Məclis tərəfindən 1994-cü il fevralın 24-də “Xocalı soyqırımı günü haqqında” xüsusi qərar qəbul edildiyini, ulu öndərin “Xocalı soyqırımı qurbanlarının xatirəsinə sükut dəqiqəsi elan edilməsi haqqında” 1997-ci il 25 fevral tarixli Sərəncamı ilə hər il fevralın 26-sı saat 17.00-da ölkə ərazisində Xocalı soyqırımı qurbanlarının xatirəsinin ehtiramla yad edildiyini diqqətə çatdırmışdır.
R.Məmmədov son illər Prezident İlham Əliyevin rəhbərliyi ilə Xocalı həqiqətlərinin dünya ictimaiyyətinə çatdırılması istiqamətində ardıcıl tədbirlərin həyata keçirildiyini bildirmiş, bu sahədə İslam Əməkdaşlığı Təşkilatının Gənclər Forumunun mədəniyyətlərarası dialoq üzrə baş əlaqələndiricisi Leyla xanım Əliyevanın təşəbbüsü ilə keçirilən “Xocalıya ədalət” kampaniyasının mühüm əhəmiyyət daşıdığını xüsusi vurğulamışdır.
Tədbirdə “Xocalı soyqırımı bəşər tarixinin ən amansız faciələrindən biridir” mövzusunda məruzə dinlənilmiş, çıxışlar olmuşdur.
Natiqlər həmvətənlərimizin qanı bahasına əldə olunan, ulu öndər Heydər Əliyev tərəfindən qorunub saxlanılan və möhkəmləndirilən, dövlətimizin başçısı İlham Əliyevin uğurlu siyasəti nəticəsində gündən-günə inkişaf edən müstəqil Azərbaycan Respublikasının hər bir azərbaycanlının qürur mənbəyi, ən böyük milli sərvəti olduğunu qeyd etmiş, bu yolda canlarından keçmiş şəhidlərimizin əziz xatirəsinin heç vaxt unudulmayacağını bildirmişlər. Qeyd olunmuşdur ki, Xocalı faciəsinin əsl mahiyyətinin dünya ictimaiyyətinə çatdırılması təkcə dövlətimizin vəzifəsi deyildir. Bu istiqamətdə ölkəmizin hər bir vətəndaşı imkanı daxilində səyini göstərməlidir.
Bölmənin digər xəbərləri
