Şəkidə ümummilli lider Heydər Əliyevin xatirəsinə həsr olunmuş Milli Atüstü Oyunlar Festivalı keçirilir
Şəki, 7 may (AZƏRTAC). Şəkinin Daşüz kəndində yerləşən Respublika Atçılıq Turizm Mərkəzində Azərbaycan xalqının ümummilli lideri Heydər Əliyevin xatirəsinə həsr olunmuş Milli Atüstü Oyunlar Festivalı keçirilir. Mədəniyyət və Turizm Nazirliyinin təşəbbüsü, Respublika Atçılıq Federasiyası və Şəki Şəhər İcra Hakimiyyətinin dəstəyi ilə keçirilən yarışlarda Balakən, Zaqatala, Qax, Şəki, Oğuz, İsmayıllı, Ağdam, Goranboy və Yevlax rayonlarını təmsil edən 9 komanda mübarizə aparır.
AZƏRTAC xəbər verir ki, mayın 7-də Atçılıq Turizm Mərkəzində festivalın təntənəli açılış mərasimi keçirilmişdir. Mərasimdən əvvəl Şəki Şəhər İcra Hakimiyyətinin başçısı Murad Cabbarlı, Mədəniyyət və Turizm Nazirliyinin məsul nümayəndələri Cavanşir Cəfərov, Fikrət Babayev və digər qonaqlar Atçılıq Turizm Mərkəzində yaradılan şəraitlə yaxından tanış olmuşlar.
Mərasimi giriş sözü ilə açan şəhər mədəniyyət və turizm şöbəsinin müdiri Aydın İbrahimxəlilov bildirmişdir ki, Mədəniyyət və Turizm nazirinin müvafiq əmri ilə 2006-cı ildə yaradılmış Respublika Atçılıq Turizm Mərkəzində artıq 6 ildir ki, ənənəvi olaraq hər il dekabr ayında “Prezident Kuboku” uğrunda Milli Çövkən Oyunları, mayda isə ümummilli liderimiz Heydər Əliyevin xatirəsinə həsr olunmuş Milli Atüstü Oyunlar Festivalı keçirilir. Fərəhli haldır ki, bu festival tədricən ümumxalq bayramına çevrilir. Getdikcə daha kütləvi xarakter alan və böyük maraq doğuran bu yarışlar xalqımızın mədəni irsi olan atüstü milli oyunların qorunub saxlanması, qədim tarixə malik atçılıq ənənələrinin bərpası, ölkəmizdə atçılıq turizminin təbliği və inkişafı məqsədi daşıyır. Şöbə müdiri mayın 9-dək davam edəcək bu festivalda komandaların çövkən milli oyunu, habelə sürpapaq, papaq və atüstü güləş oyunları üzrə yarışacaqlarını diqqətə çatdırmışdır.
Musiqi kollektivlərinin maraqlı konsert proqramından sonra komandalar cəngi sədaları altında meydana daxil olmuşlar.
Sonra tamaşaçılar çövkən oyunu üzrə Şəki və İsmayıllı komandalarının qarşılaşmasını izləmişlər. Oyun 4:0 hesabı ilə Şəki komandasının xeyrinə başa çatmışdır.
Bir gün əvvəl keçirilən seçmə oyunlarda isə aşağıdakı nəticələr qeydə alınmışdır: Ağdam-Zaqatala- 4:0, Şəki-Qax- 6:0, Balakən-Oğuz- 3:2.
Festivalın təntənəli bağlanış mərasimi mayın 9-da keçiriləcəkdir. Mayın 10-da isə Atçılıq Turizm Mərkəzində təcrübəli mütəxəssislərin iştirakı ilə çövkən, sürpapaq və papaq oyunları üzrə ustad dərsləri keçiriləcəkdir.
Festivalın əhəmiyyəti barədə fikirlərini müxbirimizlə bölüşən Mədəniyyət və Turizm Nazirliyinin məsul nümayəndəsi Cavanşir Cəfərov demişdir: Ümummilli liderimiz Heydər Əliyev müstəqil Azərbaycanın milli dəyərlərinin dirçəldilməsi və inkişaf etdirilməsinə həmişə böyük diqqət və qayğı ilə yanaşırdı. Fərəhli haldır ki, ulu öndərimizin layiqli davamçısı Prezident İlham Əliyev də milli-mənəvi dəyərlərimizin qorunması və təbliğinə böyük əhəmiyyət verir. Bu gün Azərbaycanın mədəni sərvətlərinin, milli irsimizin ümumdünya mədəni irsi siyahısına daxil olması bizi çox sevindirir. Burada keçirilən Milli Atüstü Oyunlar Festivalı də məhz daşınmaz mədəni irsimizin qorunub saxlanmasına xidmət edir.
######
Bölmənin digər xəbərləri
