Şəmkir, Tovuz, Qazax, Ağstafa və Gədəbəy üzrə 157 inzibati ərazi dairəsinin xəritələri hazırlanıb
Bakı, 7 oktyabr, AZƏRTAC
Əmlak Məsələləri Dövlət Xidməti və Şəmkir Rayon İcra Hakimiyyətinin birgə təşkilatçılığı ilə Şəmkirdə torpaq və əmlak idarəçiliyinə həsr olunan zona müşavirəsi keçirilib. Müşavirədə Şəmkir, Tovuz, Qazax, Ağstafa və Gədəbəy rayonlarının yerli icra hakimiyyəti orqanlarının məsul əməkdaşları, aidiyyəti dövlət qurumlarının,
bələdiyyələrin nümayəndələri iştirak ediblər.
Dövlət Xidmətindən AZƏRTAC-a bildirilib ki, tədbirdə torpaqların və dövlət əmlakının idarə edilməsi, istifadəsi və mühafizəsinə nəzarət olunması, bələdiyyə torpaqlarının hüquqi və fiziki şəxslərin mülkiyyətinə və ya icarəsinə verilməsi ilə bağlı rəyvermə işləri və digər məsələlər, elektron baza xəritələrinin işlənməsi barədə məlumat verilib. Qeyd edilib ki, Şəmkir, Tovuz, Qazax, Ağstafa və Gədəbəy rayonları üzrə ümumilikdə 389 min hektar ərazidə torpaq və üzərindəki
daşınmaz əmlaklar barəsində müfəssəl kadastr məlumat bazası yaradılıb. Kadastr uçotu işləri nəticəsində bələdiyyələrin, dövlət torpaqlarının sərhədləri müəyyənləşdirilib və adıçəkilən rayonlar üzrə 157 inzibati ərazi dairəsinin xəritələri hazırlanaraq Milli Məclisə təqdim edilib. Tədbirdə Şəmkir rayonu üzrə torpaqların elektron kadastr uçotu işləri elektron olaraq nümayiş olunub.
Ötən il və bu ilin yanvar-sentyabr ayları ərzində bu rayonlarda Dövlət Xidməti tərəfindən aparılan monitorinqlərin, rayon icra hakimiyyətlərindən alınmış məlumatların təhlili göstərir ki, bəzi hallarda kənd təsərrüfatına yararlı torpaq sahələri təyinatı üzrə istifadə olunmur, qanunvericiliyinin tələbləri pozulmaqla torpaqlar əkin dövriyyəsindən çıxarılır və münbit qatı korlanır, yararlı əkin, örüş və otlaq sahələri qeyri-kənd təsərrüfatı məqsədləri üçün əsassız olaraq verilir və ya zəbt edilir.
Ümumilikdə, 2022-ci və 2023-cü illərin 9 ayı ərzində Əmlak Məsələləri Dövlət Xidmətinin adıçəkilən rayonlarda monitorinqlər zamanı torpaq qanunvericiliyinin pozulması ilə bağlı 400-ə yaxın bu cür hallar aşkar edilərək sənədləşdirilib. Bu dövrdə torpaq qanunvericiliyinin pozulması hallarına dair müvafiq torpaq istifadəçiləri barədə 152 inzibati protokol tərtib edilib, 75 min manata yaxın cərimə tətbiq olunub. Tədbirdə torpaq qanunvericiliyinin pozulması hallarının qarşısının alınması və aradan qaldırılması istiqamətində aidiyyəti dövlət orqanları ilə birgə fəaliyyətin genişləndirilməsi, ciddi tədbirlərin görülməsinin vacibliyi diqqətə çatdırılıb. Vurğulanıb ki, torpaqlardan istifadə edilməsi və mühafizəsi sahəsində qanunvericiliyə əməl olunması ilə bağlı preventiv tədbirlərin, davamlı maarifləndirmə və izahat işlərinin aparılması, bu məsələlərdə ictimaiyyətin, media nümayəndələrinin və bələdiyyələrin iştirakının gücləndirilməsi vacibdir.
Çıxış edən rayon icra hakimiyyəti və digər dövlət orqanlarının nümayəndələri, bələdiyyə sədrləri torpaq və əmlak idarəçiliyi sahəsində qarşılaşdıqları məsələlərdən bəhs ediblər.
Sonda iştirakçıların sualları cavablandırılıb, təklifləri dinlənilib.
Bölmənin digər xəbərləri
