Şərur rayonunda qısa müddətdə 200 hektardan artıq sahədə qarğıdalı əkini aparılıb
Şərur, 18 aprel, AZƏRTAC
Muxtar respublikanın Şərur rayonunda iqtisadi baxımdan sərfəli bitki olan qarğıdalı əkininə başlanılıb. Qısa zamanda 200 hektardan artıq sahədə əkin aparılıb.
AZƏRTAC-ın Naxçıvan bürosu xəbər verir ki, bölgədə qarğıdalı əkinləri xüsusi texnikalarla həyata keçirilir. Ailə təsərrüfatçıları çalışırlar ki, əkinləri optimal müddətdə aqrotexniki qaydalar əsasında həyata keçirsinlər. Bu sahədə təcrübəli ailə təsərrüfatçıları daha yaxından iştirak edir, gələcəyin bol məhsulu üçün zəmin yaradırlar. Bunun üçün əkindən əvvəl torpaq münbitləşdirilib, dərin şum aparılıb.
Rayonda tərəvəz əkini sahələri də əkinə hazırlanır. Bitkilərin suvarılması mexaniki üsulla həyata keçirilir. Bu məqsədlə 1,5 hektar ərazidə çiləyici qurğular quraşdırılıb. Qarğıdalı əkinlərinin suvarılması üçün də hazırlıq işləri görülür.
Qeyd edək ki, qarğıdalı zəngin qida elementlərinə malik bitkidir. Son illər bu bitkinin muxtar respublikada əkilib-becərilməsinə diqqət xeyli artıb. Xüsusilə qədim əkinçilik diyarı olan Şərur rayonunun torpaq mülkiyyətçiləri iqtisadi baxımdan səmərəli olan qarğıdalı əkinlərinə üstünlük verir. Ötən il rayonda 1218 hektarda qarğıdalı yetişdirilib, 12 min 545 ton məhsul götürülüb.
Bölmənin digər xəbərləri
