Səudiyyə Ərəbistanında 31 mart - Azərbaycanlıların Soyqırımı Günü ilə əlaqədar anma mərasimi keçirilmişdir
Bakı, 31 mart (AZƏRTAC). Martın 31-də Azərbaycan Respublikasının Səudiyyə Ərəbistanı Krallığındakı səfirliyində 31 mart - Azərbaycanlıların Soyqırımı Günü ilə əlaqədar anma mərasimi keçirilmişdir.
Səfirlikdən AZƏRTAC-a bildirmişlər ki, anma mərasimində soyqırımı qurbanlarının xatirəsi bir dəqiqəlik sükutla yad edilmişdir.
Səfir Rasim Rzayev erməni millətçiləri tərəfindən xalqımıza qarşı həyata keçirilən soyqırımı siyasətinin iki yüz ilə yaxın tarixi olduğunu vurğulamış, Azərbaycan torpaqlarına erməni əhalisinin köçürülüb yerləşdirilərək, demoqrafik vəziyyətin zorla dəyişdirilməsi, 1905-ci və 1918-ci illərdə azərbaycanlı əhalini qorxutmaq və qovmaq məqsədi güdən kütləvi qırğınların törədilməsi haqqında geniş məlumat vermiş, xalqımıza qarşı təcavüzün bu gün də davam etdiyini, onun ağır nəticələrinin yüz minlərlə soydaşımızın taleyində özünü göstərdiyini qeyd etmişdir.
Digər çıxış edənlər ermənilərin dəhşətli əməllərinin bəşəriyyətə qarşı cinayət kimi hüquqi-siyasi qiymət alması istiqamətində səylərin artırılmasının əhəmiyyətini vurğulamış, bu siyasətin hazırda da davam etdiyini və dünya ictimaiyyətinin səssiz qalmasının təəssüf doğurduğunu qeyd etmişlər.
Tədbirdə erməni millətçiləri tərəfindən xalqımıza qarşı aparılmış soyqırımı ilə bağlı film nümayiş etdirilmişdir.
Bölmənin digər xəbərləri
