Silahlı Qüvvələr Günü münasibətilə Xırdalanda avtoyürüş təşkil olunub
Xırdalan, 27 iyun, Ətrabə Rzayeva, AZƏRTAC
Silahlı Qüvvələr Günü münasibətilə Xırdalan şəhərində avtoyürüş keçirilib.
Abşeron Rayon İcra Hakimiyyətinin təşəbbüsü ilə reallaşan tədbirin iştirakçıları əvvəlcə Xırdalandakı Şəhidlər xiyabanını ziyarət edib, şəhid məzarları üstünə gül dəstələri qoyublar.
AZƏRTAC xəbər verir ki, yürüşdən əvvəl keçirilən tədbirdə Azərbaycan Silahlı Qüvvələrinin yaranma tarixindən və inkişafından söz açılıb.
Qeyd edilib ki, ulu öndər Heydər Əliyev hakimiyyətdə olduğu dövrdə ordu quruculuğunu, Silahlı Qüvvələrin təkmilləşdirilməsini və maddi-texniki bazasının gücləndirilməsini, milli hərbi kadrların hazırlanmasını daim diqqətdə saxlayıb. Prezident, Müzəffər Ali Baş Komandan İlham Əliyevin həyata keçirdiyi tədbirlər sayəsində Silahlı Qüvvələrimiz modernləşdirilib və bölgənin ən güclü ordusuna çevrilib. Azərbaycan Ordusu Ali Baş Komandanın əmri ilə ölkəmizin ərazi bütövlüyünü bərpa edib. Vətən müharibəsi Azərbaycan Ordusunun gücünün bariz nümunəsidir. Vurğulanıb ki, Prezident İlham Əliyevin rəhbərliyi ilə Azərbaycan Silahlı Qüvvələri dünyanın 50 ən güclü ordusu sırasında yüksəlib.
Sonra icra hakimiyyətinin inzibati binasının qarşısından avtoyürüşə start verilib. Şəhərin mərkəzi küçələri boyunca hərəkət edən avtomobil karvanının son dayanacağı Ümummilli Liderin adını daşıyan parkın girişi olub. İştirakçılar ulu öndər Heydər Əliyevin abidəsini ziyarət ediblər.
Yürüşdə iştirak edən "BMW Club Azərbaycan" üzvlərinə təşəkkürnamə təqdim olunub.
Bölmənin digər xəbərləri
