Vyana, 24 iyun, AZƏRTAC

Azərbaycanın Polşadakı səfirliyinin təşkilatçılığı ilə Varşavada Azərbaycan Silahlı Qüvvələrinin yaradılmasının 108-ci ildönümü münasibətilə tədbir keçirilib. Tədbirdə Polşa-Azərbaycan Parlament Qrupunun sədri, Xarici İşlər və Milli Müdafiə nazirliklərinin əməkdaşları, Varşavanın Praqa-Poludne rayonunun merinin müavini və əməkdaşları, Müsəlman Dini Birliyinin, eləcə də yerli tatar icmasının nümayəndələri, ziyalılar, Azərbaycan icmasının üzvləri və səfirliyin əməkdaşları iştirak ediblər.

AZƏRTAC xəbər verir ki, tədbirdə səfir Nərgiz Qurbanova, Polşa-Azərbaycan Parlament Qrupunun sədri Pşemıslav Vitek, Varşavanın Praqa-Poludne rayonunun merinin müavini Lukaş Polintseuş çıxış ediblər.

Səfir çıxışında cari ildə Azərbaycan Respublikası Silahlı Qüvvələrinin 108-ci ildönümünün qeyd olunması, 26 iyun 1918-ci ildə yeni qurulan Azərbaycan Demokratik Respublikasının (ADR) ilk nizami hərbi hissəsinin yaradılması barədə məlumat verib. O əlavə edib ki, gənc ölkə 1918-1920-ci illərdə yaşamaq uğrunda mübarizə aparanda polyak zabitləri azərbaycanlılarla çiyin-çiyinə vuruşublar. Belə ki, ADR-in Baş Qərargah rəisi general Maçey Sulkeviç hərbi biliklərini, həmçinin həyatını Azərbaycana həsr edib. Səfir N.Qurbanova M.Sulkeviçlə yanaşı, polyak zabitlərini, o cümlədən polkovnik Yevgeniusz Dunin-Marçinkeviç və kapitanlar Klossovski, Çarnietski, Pavlovski və Tomişini xatırlayıb. O qeyd edib ki, polkovnik Dunin-Marçinkeviç və kapitan Rodzieviçin fəal iştirakı, eləcə də Polşa ictimaiyyətinin əhəmiyyətli dəstəyi sayəsində Bakıda sursat təmiri və istehsalı zavodu yaradılıb.

Həmçinin Vəli bəy Yadigar, İsrafil bəy İsrafilov, Cahangir bəy Kazımbəyli, Həmid bəy Məmmədzadə və Kazım bəy Səfəroğlu kimi komandirlərin Polşa ordusunda xidmət etdiyi barədə məlumat verilib. N.Qurbanova Vəli bəy Yadigar haqqında danışarkən azərbaycanəsilli bu görkəmli hərbçinin Polşa ordusunda yüksək nüfuz qazandığı, İkinci Dünya müharibəsi dövründə Polşanın müstəqilliyi uğrunda fədakarlıqla mübarizə apardığı, onun azadlığını öz Vətəninin azadlığı kimi qoruyaraq xalqlarımız arasında qardaşlıq və həmrəyliyin ən parlaq nümunələrindən birinə çevrildiyini qeyd edib.

Səfir müstəqilliyimizin ilk dövrünün sovet işğalı nəticəsində yarımçıq qalmasına baxmayaraq, xalqımızın döyüş ruhunun və dövlətçilik ənənələrinin heç vaxt sarsılmadığını qeyd edərək ölkəmizin 1991-ci ildə dövlət müstəqilliyini bərpa etdikdən sonra mürəkkəb geosiyasi və təhlükəsizlik çağırışları ilə üzləşdiyini, lakin dövlət və ordu quruculuğu prosesinə qətiyyətlə başladığını bildirib. Beləliklə, müstəqil Azərbaycan dövləti və onun Silahlı Qüvvələri möhkəm əsaslar üzərində yenidən formalaşdırılıb.

Müasir və peşəkar Azərbaycan Silahlı Qüvvələrinin formalaşmasında Ümummilli Lider Heydər Əliyevin müstəsna xidmətlərindən bəhs edən səfir N.Qurbanova Ulu Öndərin uzaqgörən siyasəti nəticəsində ölkəmizin müdafiə sisteminin əsaslı şəkildə yenidən qurulduğunu, pərakəndə hərbi birləşmələrin vahid komandanlıq əsasında fəaliyyət göstərməyə başladığını, yüksəkintizamlı və peşəkar orduya çevrildiyini bildirib. Səfir, həmçinin Ümummilli Liderin zəngin irsinin Prezident, Silahlı Qüvvələrin Ali Baş Komandanı İlham Əliyevin rəhbərliyi altında uğurla davam etdirildiyindən söz açıb. O əlavə edib ki, dövlətimizin başçısının məqsədyönlü siyasəti nəticəsində Azərbaycan Silahlı Qüvvələri müasir standartlara uyğun şəkildə modernləşdirilib, maddi-texniki bazası gücləndirilib, döyüş hazırlığı və peşəkarlıq səviyyəsi əhəmiyyətli dərəcədə yüksəldilib və bunun nəticəsində Azərbaycan Ordusu regionun ən güclü və yüksək hazırlıqlı silahlı qüvvələrindən birinə çevrilib.

Mərasim zamanı çıxış edən Varşava şəhərinin Praqa-Poludne rayonunun merinin müavini L.Polintseuş Polşa və Azərbaycan xalqlarını mühüm tarixi bağların, eləcə də azadlıq və müstəqillik uğrunda mübarizə təcrübəsinin birləşdirdiyini vurğulayıb. Mer müavini qeyd edib ki, mərasimin keçirildiyi abidə hər iki xalqın tarixində xüsusi yeri olan iki qəhrəmana həsr olunub - Azərbaycanın müstəqilliyi uğrunda xidmət göstərmiş və bu yolda həyatını qurban vermiş general Maçey Sulkeviçə, eləcə də Polşa uğrunda, o cümlədən Varşava üsyanı zamanı döyüşmüş azərbaycanlı zabit polkovnik Vəli bəy Yadigara.

L.Polintseuş çıxışında marşal Yuzef Pilsudskinin “Yaddaşını itirən xalq xalq olmaqdan çıxır, yalnız müəyyən bir ərazidə müvəqqəti yaşayan insanlar toplusuna çevrilir” fikrini xatırladaraq, tarixi yaddaşın qorunmasının əhəmiyyətini vurğulayıb. O qeyd edib ki, məhz bu tarixi yaddaşa və ortaq irsə hörmət Azərbaycan tərəfini sözügedən abidənin yaradılması təşəbbüsü ilə çıxış etməyə sövq edib. Merin müavini, həmçinin Polşa ilə Azərbaycan arasında dostluq və əməkdaşlıq münasibətlərinin bu gün də uğurla inkişaf etdiyini bildirib. O vurğulayıb ki, müasir dövrdə də hər iki xalq ortaq dəyərlər ətrafında birləşərək həmrəylik nümayiş etdirir.

Tədbirdə çıxış edən Polşa–Azərbaycan Parlament Qrupunun sədri P.Vitek Polşa və Azərbaycan xalqları arasında mövcud olan tarixi oxşarlıqlara diqqət çəkib. O bildirib ki, həm polyaklar, həm də azərbaycanlılar müstəqillik, suverenlik, milli kimlik və mədəni dəyərlərin qorunması uğrunda mübarizənin nə demək olduğunu yaxşı anlayırlar. Deputat vurğulayıb ki, hər iki xalq öz tarixində müstəqilliyin itirilməsi kimi ağır sınaqlarla üzləşib və məhz buna görə dövlətçilik və milli azadlığın dəyərini xüsusi həssaslıqla qiymətləndirir. P.Vitek çıxışında Azərbaycanın son illərdə əldə etdiyi uğurlara da toxunub. O qeyd edib ki, Azərbaycan iqtisadi inkişaf, infrastrukturun modernləşdirilməsi və nəqliyyat imkanlarının genişləndirilməsi sahələrində mühüm nailiyyətlər qazanaraq regionun aparıcı dövlətlərindən birinə çevrilib. Onun sözlərinə görə, ölkənin artan beynəlxalq nüfuzu və strateji əhəmiyyəti Azərbaycanı regionda mühüm tərəfdaş kimi ön plana çıxarır. Çıxışının sonunda P.Vitek Azərbaycan xalqını Silahlı Qüvvələri Günü münasibətilə təbrik edib, ölkəmizə sülh, əmin-amanlıq, rifah və davamlı inkişaf arzulayıb.

Rəsmi çıxışların ardınca Varşava qarnizonunun müşayiətində Azərbaycanın Polşadakı səfirliyi, Praqa-Połudne rayonun meriyası, Polşa-Azərbaycan Parlament Qrupu, Polşanın Müsəlman Dini Birliyi, Polşa Tatar İttifaqı və s. adından Yuzef Polinski parkında azərbaycanlı polkovnik Vəli bəy Yadigar və general Maçey Sulkeviçin xatirəsinə ucaldılmış abidənin önünə əklil və gül dəstələri qoyulub.