Silahlı Qüvvələrin yanacaq xidməti rəislərinin toplantısı keçirilib
Bakı, 25 dekabr, AZƏRTAC
Müdafiə naziri, general-polkovnik Zakir Həsənovun təsdiq etdiyi plana əsasən Silahlı Qüvvələrin birlik, birləşmə və əlahiddə hərbi bölmələrinin yanacaq xidməti rəisləri ilə cəbhə bölgəsində 2014-cü ilin yekunlarına həsr olunmuş toplantı keçirilib.
Müdafiə Nazirliyinin mətbuat xidmətindən AZƏRTAC-a bildiriblər ki, tədbirdən əvvəl ümummilli lider Heydər Əliyevin və Vətənimizin ərazi bütövlüyü uğrunda şəhid olanların xatirəsi yad edilib.
Toplantıda Müdafiə Nazirliyinin zabiti, polkovnik Hüseyn Vəliyev orduda həyata keçirilən islahatların xalqımız tərəfindən rəğbətlə qarşılandığını söyləyib.
Bildirilib ki, ordu rəhbərliyi tərəfindən Silahlı Qüvvələrin maddi-texniki bazasının yenilənməsinə xüsusi önəm verilir.
Silahlı Qüvvələrin yanacaq-sürtgü materialları, müasir texnika və digər avadanlıqla təchiz olunması istiqamətində görülən işlərdən danışan H.Vəliyev yeni səhra yanacaqdoldurma məntəqələrinin, müasir tələblərə cavab verən yanacaq anbarlarının tikilib istifadəyə verilməsinin planlaşdırıldığını və bu fəaliyyətlərin davam etdiyini vurğulayıb.
Sonra texniki vasitələrin istismarı, saxlanılması, yeni kart sisteminə keçid və digər yeniliklər barədə məlumat verilib, müdafiə nazirinin tapşırığına əsasən ordumuzun bu sahədə gücləndirilməsi istiqamətində qarşıda duran vəzifələr şəxsi heyətin diqqətinə çatdırılıb.
Bölmənin digər xəbərləri
