Şimali Koreya lideri nüvə dövləti mövqeyindən istifadə edəcəyini açıqlayıb
Pekin, 23 iyun, AZƏRTAC
Şimali Koreya lideri Kim Çen In ölkəsinin nüvə dövləti mövqeyindən istifadə etməsinin gözlənilməz və mürəkkəb qlobal təhlükəsizlik vəziyyətinin öhdəsindən gəlməkdə yeganə yol olduğunu bildirib.
AZƏRTAC Koreya Mərkəzi Xəbər Agentliyinə (KCNA) istinadla xəbər verir ki, Kim Çen In bu fikri hakim Koreya Fəhlə Partiyasının Mərkəzi Komitəsinin iclasında səsləndirib.
Agentliyin məlumatına görə, Kim Çen In hegemon qüvvələrin acgözlüyü səbəbindən ağlagəlməz hadisələrin baş verdiyini, bunun da dünyada qarşıdurmaları daha da şiddətləndirdiyini vurğulayıb. O, Amerika Birləşmiş Ştatlarını (ABŞ) Avropada və Yaxın Şərqdə qan tökülməsinin pisləşməsinə görə günahlandırıb.
Şimali Koreya lideri ABŞ-ni və Cənubi Koreyanı ortaq nüvə mövqeyini davamlı olaraq təkmilləşdirməklə Koreya yarımadasındakı vəziyyəti daha təhlükəli etməkdə günahlandırıb. Onun sözlərinə görə, bunun yeganə məqsədi Şimali Koreyaya hücum etməkdir.
"Nüvə qüvvələrini davamlı olaraq genişləndirmək və gücləndirmək, nüvə silahı dövləti mövqeyini hərtərəfli şəkildə həyata keçirmək gözlənilməz beynəlxalq hərbi və siyasi vəziyyətin bir çox cəhətdən mürəkkəbləşməsi ilə fəal və inamla mübarizə aparmağın ən düzgün və unikal yoludur”, - deyə KCNA yazır.
Agentlik ölkənin nüvə arsenalına dair görülə biləcək konkret tədbirlər barədə ətraflı məlumat verməyib. Qeyd olunub ki, Kim Çen In, həmçinin adi silahların istehsalı və 10 min tonluq strateji idarəolunan raket kreyserinin inşasının sürətləndirilməsini əmr edib.
Bundan başqa, Şimali Koreya lideri partiya iclasında strateji prioritet kimi xarakterizə etdiyi kömür sənayesinin modernləşdirilməsi və mədənçilik qəsəbələrinin yenidən qurulması istiqamətində səyləri vurğulayıb.
Qeyd edək ki, özünü nüvə dövləti elan edən Şimali Koreya illərlə davam edən diplomatik səylərə baxmayaraq, heç nəyin bu ölkəni nüvə silahından imtina etməyə inandıra bilməyəcəyini açıqlayıb.
Bölmənin digər xəbərləri
