Şinzo Abe fövqəladə vəziyyətin tətbiqi üçün müxalifət partiyalarının liderləri ilə müzakirələr aparır
Tokio, 5 mart, AZƏRTAC
Yaponiyanın Baş Naziri Şinzo Abe ölkədə fövqəladə vəziyyətin tətbiqi ilə əlaqədar müxalifət partiyalarının dəstəyini qazanmaq niyyətindədir.
AZƏRTAC xəbər verir ki, bu məqsədlə Baş Nazir həmin partiyaların liderləri ilə müzakirələr aparır.
Vəziyyətin ağırlaşmasının qarşısını almaq üçün Ş.Abe beş müxalifət partiyasının lideri ilə görüşüb. Məqsəd fövqəladə vəziyyətin elan edilməsi ilə bağlı qanunun qəbul olunması üçün onların dəstəyini qazanmaqdır. Fövqəladə vəziyyətin elan edilməsi Baş Nazirə və qubernatorlara yeni koronavirusdan zərərçəkmiş rayonlarda xəstəliklə mübarizə üçün yeni səlahiyyətlər verəcək. Bundan sonra onlar ticarət mərkəzlərində, kütləvi əyləncə yerlərində iş gününün qısaldılması barədə addımlar ata biləcəklər. Eyni zamanda, müxtəlif tikililərdən bu obyektlərin sahiblərinin icazəsi olmadan istifadə etmək hüququ qazanacaqlar.
Müxalifət partiyalarının liderləri ilə görüşən Ş.Abe bildirib ki, qarşıdakı bir-iki həftə virusla mübarizədə həlledici əhəmiyyətə malikdir və hökumət fövqəladə vəziyyət elan etməmək üçün lazım olan bütün addımları atır.
Əlavə olaraq bildirək ki, hazırda yeni koronavirus Yaponiyanın demək olar, əksər ərazisində yayılıb. Son məlumatlara görə, COVID-19 koronavirusuna yoluxanların sayı 1010 nəfərə çatıb ki, bunların da 700-dən çoxu “Diamond Prinsess” kruiz laynerində olanlardır. Eyni zamanda, həmin virusdan 12 nəfərin öldüyü də bildirilir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
